«Илебез азатлыгы өчен сугышкан хәрбиләрне, тыл хезмәтчәннәрен онытырга тиеш түгелбез»

Вәкил Галиев, фермер:
– Балык Бистәсе районындагы Күки авылыннан һәр гаиләдән диярлек ир-атлар фронтка киткән. Авылдашыбыз Миңнулла Гыйззәтуллин сугышта батырлыклар күрсәтеп, Советлар Союзы Герое исеменә лаек булган. Аның белән горурланабыз. Мәктәптә сугыш ветераннары белән очрашулар үткәрелә иде, кызганыч алар инде арабызда юк. Ләкин, аларның исемнәре онытылмый. Мәктәп каршына Герой Миңнулла Гыйззәтуллинга - бюст, ә авыл уртасында Бөек Ватан сугышында катнашканнар хөрмәтенә һәйкәл-обелиск куелган.

Зөлфирә Сәфәргалиева, хезмәткәр:
– Бөек Ватан сугышы кешелек тарихындагы иң зур һәм иң канкойгыч сугышларның берсе. Элекке СССР иң күп корбаннарга дучар ителгән. Татарстан Рәисе Рөстәм Миңнеханов тәкъдимендә, республикада 2026 ел – Хәрби батырлык һәм хезмәт фидакарьлеге елы. Без илебез азатлыгы өчен гомерләрен дә кызганмыйча сугышкан хәрбиләрне, фронт өчен алны-ялны белмичә эшләгән тыл хезмәтчәннәрен онытырга тиеш түгелбез. Махсус хәрби операциядә катнашучыларга халык теләктәшлек күрсәтә.

Наилә Гатина, укытучы:
– Мәктәпләрнең барысында да диярлек “Сугышчан дан һәм туган як” музейлары оештырылган. Экспонатлар укучы балаларны ватанпәрвәрләр итеп тәрбияләүдә актив файдаланыла. АКШта һәм Европаның кайбер илләрендә 1941-1945 еллардагы сугышта СССРның фашизмны тар-мар итүдә хәлиткеч роль уйнаганлыгын күрсәтмәскә омтылалар. Без яшь буыннарга илебезгә каршы сугыш башлаган немец-фашист гаскәрләрен җиңүебез турында сөйләргә, чын дөреслекне якларга тиеш.

Тимур Йосыпов, мәдәният хезмәткәре:
– Җиңү көне – элекке СССР республикалары өчен уртак бәйрәм. Бөек Ватан сугышында совет халкы бердәм рәвештә илбасарларга каршы көрәшкә күтәрелгән. Һәр милләтнең үзенең сугыш Геройлары һәм тыл Батырлары бар. Алар белән горурланабыз, балаларга үрнәк итеп куябыз. Россиядә 2026 ел – Халыклар бердәмлеге елы. Россиядә, шул исәптән Татарстанда, күп милләтләр вәкилләре яши. Өлкән буыннар кебек бердәм булсак, безне бернинди көчләр дә җиңә алмас.