Ираннан җиләк-җимеш кертү тукталды: бәяләр үсәрме?

Иран безнең илгә әфлисун, мандарин, лимон, грейпфрут, виноград, карбыз, финик, йөзем, чикләвекләр, креветка, яшеллек һәм кайбер төр яшелчәләрне җибәрә иде.

Бу продуктлар күләме кимү аларга бәяләр үсүгә китерергә мөмкин, дип кисәтә белгечләр. Кыяр бәясе "репетиция" генә булган, дип шаяртучылар да бар.
Изге урын буш тормый, билгеле. Ираннан килә торган җиләк-җимешләрне Әфганстан алмаштырырга әзер. Бу илдән безгә узган ел яз 25 тонна анар, 50 тонна алма җибәрелгән иде.

8 мартка булган мәгълүматлар буенча, Әфганстан Россиягә 100 тонна алма җибәргән инде. Шулай ук борыч, сельдерей, баклажан, җиләкләр, цитруслар, чикләвекләр һ.б. җибәрергә әзерләнә.

...Казан базарларында Ираннан килгән финиклар, әфлисун һәм карбызны күрергә була.
Иранның Мазафати сортлы финиклары итләч, баллы. Аның кабыгы юка. Бәясе дә, чагыштырмача кыйммәт түгел.

Моннан тыш Ираннан Захеди сортлы тыгызрак структуралы финиклар кайтаралар. Язгы кояш карау белән беренче карбызларны да Ираннан алып кайталар иде. Аларның бәясе кыйммәт булса да, авитаминоздан интеккән, җәй тәмен татып карарга теләүчеләр табыла, үзе. Тик шунысы бар, ерак илдән кайткан карбызларның эче һәрвакытта да яхшы булмый. Салкында өшеп, чери башлый.

Ираннан безгә килә торган иң яхшы продуктларның берсе - фисташка. Ул бренд. Иранныкы кебек фисташканы бер илдә дә табып булмый. (Әгәр фисташка яратасыз икән, алып калыгыз).

Дөресен генә әйткәндә, Кытай булганда  бәяләр үсәр, ач калырбыз дип борчылырга кирәкми. 2025 елда бу илдән безгә кайта торган җиләк-җимеш күләме 46 процентка арткан. 2024 елда Казан базарларында Яңа ел алдыннан Абхазия мандариннары дип сатылган мандариннар да, без күрмәгән һәм колак ишетмәгән сортлы виноградлар, экзотик җиләк-җимешне безгә Кытайдан кертәләр. Кемдер бу җиләк-җимешне яратып ала, икенче берәүләр кытайныкы гына булмасын, дип ул ризыклардан баш тарта. Сатучы сезгә алдап сатарга да мөмкин, әлбәттә. Җиләк-җимешнең кайдан килүен тәҗрибә белән генә ачыклап була.

P. S. Ничек кенә булмасын, натураль ризыкларга өстенлек бирергә тырышыгыз. Онытмагыз, арзанлы, химикатлы бай өч алма ашаганчы, кыйммәтлерәк бер алма ашауның организмга файдасы күбрәк булачак!