Юлларда ремонт эшләре башланган икән – кар яварга озак калмаган

Бакча эшләре бетте, йорт тирәсе тәртипләнде, түтәлләргә сарымсаклар утыртылды, соңгы роза гөлләре капланды... Тик суык көннәр һаман күренми. Ноябрьдә кар төшмәсә, инде хафага да калабыз.

Кар соңга калыр микән, вакытында явармы?! Көтә торгач, кар да гел яумас төсле булып тоела башлый. Яңа ел бәйрәмнәренә дә карсыз гына аяк баскан еллар булды бит. Ә кышын яңгыр ява башласа, бигрәк тә кыен була. Һава торышының шундый булуын истә тотып, көз – кияүләр акылы, дип юкка гына әйтмәгәннәрдер. Үзгәрүчән болытлы һава, урыны белән яңгыр. Ялт итеп кояш чыккан көн була, шул арада гел болытлы һавага әйләнә дә куя.

Анысы да монысы, яшь барган саен бу ел фасыллары алмашу нервыга тия башлый икән. Кемдер югары кан басымыннан интегә, кемдер башына чыдый алмый. Адәм баласы да төрле. Бераз сабырсызландык та. Тиз генә кышка керәсе килә, язын җылы көннәрне иртәрәк килүен көтәбез. Әллә үзебез узып баручы гомерне шулай ашыктырабызмы?

Кышы-язы, җәе-көзе – безнең табигатьтә барысы да бар. Әле дә фасыллар алмаша, дип сөенәбез. Җәйге эшләрдән арып, башка режимга күчәсе килә башлый. Күбрәк өйдә утырып, бакча мәшәкатьләрен читкә куясы килә. Февраль җитүгә күңел тагын ашкына. Тотынабыз инде орлык чәчәргә. Минем бер танышым декабрь аеннан ук суган орлыклары сатып ала башлый. Тагын шулай яз җитүен ашкынып көтәбез. Утыртасы-чәчәсе.

...Бу арада юлларда күп йөрелә. Күп күрелә дигәндәй. Әнә юлларда ремонт эшләре башланган. Кайдадыр юл салалар, кайдадыр күпергә тотынганнар, я торба алыштыралар. Юлларда ремонт эшләре башланган икән – кар яварга озак калмаган. Төп-төгәл әйтә алам: юлчылар беркайчан ялгышмыйлар. Димәк, ерак түгел кыш та! Салкын инде тышта...