Капиталь ремонттан соң ЗАГС бүлеге яңадан ишекләрен ачты

Мәйданы 200 квадрат метрдан артык булган бина 2008 елда төзелеп, файдалануга тапшырылган. 2025 ел ахырында биредә капиталь ремонт эшләре башланган иде.

Яңартудан соң ЗАГС бүлеге заманча, уңайлы һәм тормышындагы мөһим вакыйгаларны билгеләп үтү өчен барлык шартлар тудырылган учреждениегә әверелде.

Ремонттан соң ЗАГСта беренче никахлашу тантанасы да узды. Сергей һәм Лилия Спириналар 2026 елда Алексеевск районында никахларын теркәгән беренче пар булды.

Яшь гаиләне район башлыгы Сергей Демидов һәм Татарстан Республикасы Министрлар Кабинетының ЗАГС идарәсе җитәкчесе Эльвира Әхмәтова котлады. Алар Спириналарга ныклы гаилә, бәхет һәм иминлек теләделәр.

Чарада шулай ук Татарстан Республикасы Премьер-министры урынбасары, авыл хуҗалыгы һәм азык-төлек министры Марат Җәббаров, Россия Федерациясе Дәүләт Думасы депутаты, Дәүләт Думасы комитеты рәисе Олег Морозов, Дәүләт Думасы депутаты Айдар Метшин, Татарстан Урман хуҗалыгы министры Равил Кузюров һәм башка мәртәбәле кунаклар катнашты.

Эльвира Әхмәтова ассызыклаганча, Татарстанда традицион рухи кыйммәтләргә нигезләнгән гаилә һәм никах институты югары бәяләнә.

— Бүген күпчелек яшьләр өчен никахны теркәү — матур тантана гына түгел, ә аңлы рәвештә кабул ителгән, җаваплылык таләп итүче мөһим тормыш адымы, — диде ул.

Хәзерге вакытта Татарстан Республикасында 47 ЗАГС бүлеге эшли. Узган елда республикада 24 меңнән артык никах теркәлгән, бу алдагы ел белән чагыштырганда 1,7 процентка күбрәк. Республикада яшь һәм күп балалы гаиләләргә ярдәм итүгә аерым игътибар бирелә, социаль һәм финанс ярдәм чаралары гамәлгә ашырыла.