Кар аз, ләкин су басулар булу ихтимал

– Узган елның көзендә подрядчы оешмалар 4,3 чакрым су агу ерганаклары казыды, 13,5 чакрым су агу торбалары чистартылды. Вертелевка, Нокса һәм Киндери елгаларындагы 186 тыгылган урыннар бетерелде. Су кондызлары 14 урында барлыкка китергән буалар җибәрелде. Торак пунктлардагы волонтерлар да эшләрдә булышты, – диде шәһәр Башкарма комитетының гражданнарны яклау идарәсе җитәкчесе Сергей Чанкин.

Идел һәм Казансу елгаларының плотиналары, су ашауны булдырмау максатында, өстәмә ныгытылган. Башкаланың суларда батуларны коткару җәмгыятенең мобиль төркеме физик мөмкинлекләре чикле кешеләргә, махсус хәрби операциядә катнашучыларның гаиләләренә йорт тирәләрендәге карны һәм чүпләрне җыештыруда бушлай ярдәм күрсәтә. Узган ел мондый ярдәмне гаиләләр рәхмәтле булып кабул иткән.

Татарстан башкаласында су басу ихтималы булган зоналардан халыкны күчерү өчен 22 вакытлы пункт хәстәрләнгән. Аларга 5 мең кеше сыя. 17 бистәдә 817 йорт су басу мөмкин булган үзәнлекле урыннарга урнашкан. 

Су басу ихтималы булган бистәләр:
Борисоглебск, Коры Елга, Савиново, Красная Горка, Җиләкле Бистә, Салмачы, 1нче Май, Мирный, Царицыно, Карьер, Әке, Кече Клыки, Колсәет, Вознесение, Константиновка, Самосыр.

– Һава торышы уңайлы торса да, көчле яңгырлы һәм карлы циклон килергә мөмкин. Шул сәбәпле, су басулар күзәтелү ихтимал. Су басуларга каршы әзерлек башкарылды, халыкның да саклык чараларын күрүе сорала, – дип искәртте Сергей Чанкин.

Белеп тор!
– Су басу сигналы ишетүгә телевизорны яки радионы кабызыгыз, алардан мөһим хәбәр җиткерелергә мөмкин;
– күршеләрегезгә хәбәр бирегез;
– документларыгызны, кыйммәтле әйберләрегезне, даруларыгызны алдан ук хәстәрләп куегыз, аларны су үткәрми торган пакетларга тутырыгыз;
– җиһазларны чормага менгерегез;
– электрны, газны, мичне сүндергез;
– су басу булган йортка кайткач, электрны, газны шунда ук кабызмагыз, тикшереп чыгыгыз, шырпы кабызмагыз;
– суда торган ашамлыкларны кулланмагыз.
Янгын сүндерүчеләр һәм коткаручылар хезмәтенең бердәм телефоны: 101; 112. Чыбыклы телефоннан: 01.