Казан октябрь ахырында цифрлы технологияләр дөньясын кайнатырга җыена

Цифрлы технологияләр темасындагы әлеге чара Россиянең Цифрлы үсеш, элемтә һәм массакүләм коммуникацияләр министрлыгы белән Татарстан Хөкүмәте тарафыннан оештырыла.

– Казандагы форум – цифрлы технологияләрне ясаучыларның һәм кулланучыларның фәнни һәм эшлекле хезмәттәшлеге өчен әйдаман мәйданчык, – диде Татарстан Фәннәр академиясе президенты Рифкать Миңнеханов “Татар-информ” мәгълүмат агентлыгында үткәрелгән матбугат конференциясендә.– Форум ел саен дәүләт, бизнес, фән һәм мәгариф вәкилләрен җыя. Узган ел чарада 61 илдән 25 мең кеше катнашты, быел 1600 кешедән гариза керде инде. Транспорт, дәүләт идарәсе, сәнәгать, мәгариф, мәдәният, медицина, авыл хуҗалыгы өлкәләрендә цифрлы технологияләрне куллану, гомумән, илнең технологик иминлегенә ирешүе максат итеп куела. Форумнарның һәм форум кысаларындагы цифрлы технологияләр күргәзмәләренең нәтиҗәсе бар. Нәтиҗәсе булмаса, килмәсләр һәм күргәзмәдә катнашмаслар иде. Күргәзмәдә 300гә якын компания үзенең эшләрен күрсәтә, компанияләрнең 98 проценты мөрәҗәгать итүчеләрне таба. Эшлекле сөйләшүләрдән тыш, “ИТ-әйдаман” һәм стартаплар конкурсы, хакатон марафоны үткәрелә. “Кибер көрәш” бәйгесендә махсус хәрби операция ветераннары командалары да катнашачак.
Татарстанның дәүләт идарәсен цифрлы үстерү министры урынбасары Булат Габдрахманов хәбәр иткәнчә, форумдагы кибер турнирда Россиянең 54 төбәге һәм 15 чит ил командасы көч сынашачак. 

– Татарстан Рәисе кубогына кече роботлар турниры да була. МАХ платформасындагы чишелешләргә студентларның Бөтенроссия конкурсы бара, – диде Булат Габдрахманов.

Татарстанның сәнәгать һәм сәүдә министрының беренче урынбасары Родион Карпов әйткәнчә, республикадагы эре предприятиеләр цифрлы технологияләрне эшчәнлеккә максатчан рәвештә кертә. Innostage компаниясенең халыкара хезмәттәшлекне үстерү буенча директоры Дмитрий Шепелявый сүзләренә караганда, форумда кибериминлек мәсьәләсенә нык игътибар биреләчәк.