Казан “хыял кошының” алтын койрыгына якынлашты

– Туристлар элегрәк 1-2 көнгә генә килеп киткән булсалар, хәзер уртача 4 тәүлеккә тукталалар. Казанга инде икенче һәм тагын да күбрәк мәртәбә килүчеләр саны 8 процентка артты, – дип сөйләде “эшлекле дүшәмбе” киңәшмәсендә шәһәр Башкарма комитетының туристлыкны үстерү комитеты җитәкчесе Дарья Санникова.

Казанга килүчеләрнең 73,6 проценты илнең эчке туристлык агымыннан гыйбарәт. М-12 тизйөрешле автомагистрале ачылгач һәм Россия шәһәрләре белән авиаэлемтәләр урнаштырылгач, Урал төбәкләреннән килүчеләр күбәйгән. Чиләбе, Курган, Омск төбәкләре, Ямал-ненец автономияле округы, шулай ук Владимир, Калуга, Иваново, Рязань, Тула, Ростов, Волгоград өлкәләре кешеләре Казанны үз итә.

Туристларның иң яраткан урыны – Казан Кремле, биредә 4,5 миллионнан артык кеше булган. Башкалада 233 кунакханә эшли, алар 17 мең 217 урынга исәпләнгән. Казанда узган БРИКС саммиты йогынтысында кунакханәләр яхшылап төзекләндерелгән, быел тагын 3 кунакханә ачылачак. Төркия, Кытай, Берләшкән Гарәб Әмирлекләре, Белоруссия белән транспорт элемтәләре урнаштырылган.

– Казан-Шанхай авиаэлемтәсе ачылу уңаеннан Кытай Халык Республикасының генераль консулы белән Кытай туристлары өчен махсус туристлык маршруты булдыру турында сөйләшүләр бара, – диде Дарья Санникова.

“Казан” халыкара аэропорты узган ел 5,4 миллион пассажирга хезмәт күрсәткән. 
– Без 5 миллион турист күрсәткеченә ирешүдә финиш сызыгына чыктык, дип әйтергә була. Шәһәребез мэры Илсур Метшин 10 ел элек безнең алга нәкъ шушы максатны куйган иде. Ул вакытта бу ирешә алмаслык биеклек кебек иде. Бүген әлеге күрсәткечкә, кем әйтмешли, бер адым гына ясыйсы калды, – дип фикерләре белән уртаклашты шәһәр Башкарма комитеты җитәкчесе Рөстәм Гафаров.– Туристлар шәһәрдә 30 миллиард сумнан артык акча тотты. Бу акчалар йөзләгән җәмәгать туклануы предприятиеләренә, кунакханәләргә, кибетләргә, мәдәният учреждениеләренә керде, үзмәшгульлекнең үсешенә этәрде. Акчаларның бер өлеше салымнар рәвешендә шәһәр бюджетына күчерелде. Туристлар агымының артуы яңа чаралар программалары, яңа туристлык маршрутлары турында уйлануны таләп итә.

Рөстәм Гафаров 25 илдәге тугандашлык элемтәләре булдырылган һәм хезмәттәшлек килешүләре кабул ителгән 72 шәһәр белән туристлык мөмкинлекләрен актив кулланырга чакырды.

Баку, Истанбул, Ярославль, Калуга, Волгоград, Якутск шәһәрләрендә Казанга туристлык сәяхәтенә чакырган баннер-белдерүләр элеп куелган. Узган ел Иркутск, Грозный, Сәмәрканд шәһәрләре белән туристлык өлкәсендә хезмәттәшлек килешүләре кабул ителгән.