Казанда чүп яндыру заводы төзелеше 2030 елга күчерелде

Татарстанда предприятиеләрнең экологиягә кагылышлы законнарны һәм таләпләрне үтәүләрен ачыклау максатында, планнан тыш 140 тикшерү башкарылган.

– Тирә-юнь мохиткә зыян салган предприятиеләргә һәм оешмаларга 162 миллион сум штраф язылды, шуның 100 миллион сумы түләттерелде инде, – диде Россия табигать күзәтчелегенең Идел-Чулман төбәкара идарәсе җитәкчесе урынбасары Булат Әхмәдиев “Татар-информ” мәгълүмат агентлыгында үткәрелгән матбугат конференциясендә.

Табигатьне пычрату фактлары “БэстХим”, “КМКТ ЭМПО”, “Вертикаль”, “ТрансСтройСервис”, “Буревестник”, “РСО-Инвест”, “Промышленная экология” җаваплылыгы чикләнгән җәмгыятьләрдә ачыкланган.

– “Казан” халыкара аэропортында таможня тикшерүе вакытында бер татарстанлының әйберләре арасында жако төрендәге сирәк очрый торган тере попугай табылган. Рөхсәтсез алып кайтылган әлеге попугай вакытлыча Казан зооботаника бакчасына тапшырылды, – диде Булат Әхмәдиев.

Төбәкара идарә үзенең эшчәнлегендә электрон технологияләрне актив куллана. Мөрәҗәгатьләрне һәм отчет-хисапларны электрон рәвештә башкарырга мөмкин.

– Татарстанда полигоннар тулып килә. Берничә муниципаль берәмлеккә хезмәт күрсәтәчәк 5 полигон төзелеше башланачак. Казандагы көнкүреш калдыкларын термик эшкәртү заводы төзелеше 2030 яки 2031 елларга күчерелде, – диде Россия табигать күзәтчелегенең Идел-Чулман төбәкара идарәсе җитәкчесе урынбасары Елена Попова.

Куйбышев сусаклагычы яр буйларын җыештыру өмәләрендә экологлар белән бергә волонтерлар да катнашкан. Елена Попова:”Җиңүнең 80 еллыгы уңаеннан Татарстан, Чувашия һәм Мари Эль республикаларындагы 100 ветеранга бүләкләр илттек. Махсус хәрби операциядә катнашучыларга 4 автомобиль тапшырдык, гуманитар ярдәм җибәрәбез. Курск өлкәсенә дә ярдәм җибәрдек”, – диде.