Казанда кышка әзерлек башланды: 6 мең йорт һәм 11 мең чакрым торба тикшерелә

Өч ТЭЦ, “Савиново”, “Азино”, “Горки” район кательныйларында, “Казэнерго” акционерлык җәмгыятенең 125 котельныенда, 45 ведомство котельныенда әзерлек эшләренә керешелде. Бүген 56 йорттагы җылылык челтәренә капиталь ремонт эшләре бара.

Казанның инфраструктурасын яхшырту программасы кысаларында 1 миллиард 947 миллион сум бүлеп бирелгән. “Татэнерго” акционерлык җәмгыяте буенча төзекләндерүләргә 1,88 миллиард сум планлаштырылган. “Казэнерго” акционерлык җәмгыяте төзекләндерүләргә 754,4 миллион сум тотачак. Расланган график нигезендә җылылык белән тәэмин итү объектлары һәм социаль өлкә биналары 1 сентябрьгә әзерлек хәленә китерелергә тиеш. Казан шәһәре Башкарма комитеты җитәкчесе Рөстәм Гафаров кышкы җылыту чорына әзерлектә графикны катгый рәвештә сакларга кушты.

– Казанлыларга кышкы айларга уңай шартлар булдыру, киләсе кышның җылыту чорын аварияләрсез яшәп чыгу – безнең бурыч. Моңа ирешү өчен күп эшләр башкару сорала, – диде Рөстәм Гафаров.

Киләсе кышның җылыту чорына әзерлек эшләре Казан мэры Илсур Метшин һәм шәһәр штабы контролендә тотыла.

Шәһәрнең торак-коммуналь хуҗалык комитеты рәисе Илсур Хисмәтуллин әйткәнчә, 2025-2026 елларның кышкы җылыту чоры тотрыклы узган, зур аварияләр булмаган, җылылык бирү өзелмәгән.

Казанда кышкы җылыту чоры 2025 елның 29 сентябрендә старт алган иде һәм 2026 елның 7 маенда тәмамланды, бу – 220 көн. Тышкы һава температурасы 5 көн дәвамында +8 градустан югары торганда, йортларга һәм биналарга җылылык бирү тәмамлана.