Лаешта 1 кеше боз астына китеп үлде инде

Ястык калынлыгы булса да, язгы бозга ышанма, дип әйтелә мәкльдә. Ләкин, балыкчылар һәм халык арасында гомерләрен куркыныч астына куеп, боз өстенә чыгучылар табыла тора. 2025 елның язында 6 кеше боз астына китеп үлде.

– Быелның язында да фаҗигале хәлләр күзәтелә башлады. Лаеш районында 15 мартта снегоходка тагылган чанадагы 6 балыкчы, боз ватылып, суга егылып төшәләр. Кызганыч, аларның берсе батып үлә. Хәзер елгаларда һәм күлләрдә боз калынлыгы 20 сантиметрны тәшкил итә. Тик, бу күрсәткеч төрле урында төрлечә. Синоптиклар сүзләренә караганда, инде төннәрен дә җылы һава урнаша, шунлыктан, елгалардагы һәм күлләрдәге боз өслегенә чыгуларны туктатырга кирәк. Балык өчен гомерне корбан итәргә, гаиләгә олы фаҗига тудырырга ярамый, – дип кисәтте Россия Гадәттән тыш хәлләр министрлыгының Татарстан буенча баш идарәсенең сулыкларда кешеләр иминлеге бүлеге җитәкчесе Регина Гаязова “Татар-информ” мәгълүмат агентлыгында үткәрелгән матбугат конференциясендә.

Күптән түгел Тәтеш шәһәрендә дә 4 балыкчы Иделдә боз ватылып, суга төшә.

– Боз өстендә балык тотканда коткару жилеты кию зарур. Тәтештәге балыкчылар, ярый әле, коткару жилетлары кигән булганнар, исән калдылар. Боз өстенә чыкканнары өчен аларга, барыбер дә, административ беркетмә тутырылачак, – диде Регина Гаязова.

Калынлыгы 7 сантиметрдан кимрәк булганда сулыклардагы боз өстенә чыккан кешеләргә 1,5 мең сумнан 2 мең сумга кадәр штраф салына. 
Татарстанда елгаларда бозлар агып-эреп беткәнче вакытка кадәр 10 урында “МЧС коткару хезмәте” эшләячәк. Мондый пунктлар Казанда, Яшел Үзәндә, Лаешта, Кама Тамагында, Алексеевскийда, Чистайда, Түбән Камада, Чаллыда, Минзәләдә оештырыла.

– Казанда узган елның көзендә 2 малай велосипедта Казансу елгасында боз өстендә хәрәкәтләнәләр һәм боз ватылып, суга егылалар. Бәхетләренә, аларны бер ир-ат күреп ала, йөгереп килеп, коткара. Мәктәпләрдә шушы араларда язгы каникул башлана. Ата-аналар балаларына язгы боз өстенә керергә ярамаганлыгын аңлатсыннар һәм кисәтсеннәр иде, – диде Регина Гаязова.

Билгеле булганча, «Экологик иминлек» илкүләм проекты гамәлгә ашырыла.