«Милләтебез бер гамәле белән дә үз йөзенә тап төшермәде»

"Милләт җыены”ның пленар утырышында Татарстан Бөтендөнья татар конгрессы Милли Шурасы рәисе Васил Шәйхразыев шулай дип белдерде.  
- Бу бик зур, абруйлы, дәрәҗәле максат. Һәр татар кешесе, гаиләсе, үз йөрәге белән Татарстанны үзәге һәм учагы дип күрергә тиеш. Кирәк булса – киләчәге дип тә! Татарлар  турында сөйләүләр булса да, милләтебез бер гамәле белән дә үз йөзенә тап төшермәде, - дип ассызыклады ул. 

1992 елда шушы вакытларда Казанда Бөтендөнья татар конгрессының Беренче съезды узган булган һәм 33 ел дәвамында Бөтендөнья Татар конгрессы уңышлы, нәтиҗәле эшләп килә.  
- Без зур эш юлы үттек, бүген танылган һәм дәрәҗәле, дөнья күләмендә эшләүче оешмага әйләндек. Конгресс өчен кече яисә зур эшләр юк. Барысы да кирәкле, урынлы  һәм барысы да мөһим. Тамчыдан күл җыела, ди халкыбыз. Барысын да кулланып эшләргә кирәк, - дип ассызыклады Васил Шәйхразыев.