Мылтык үрдәкләрне түгел, ә дроннарны бәреп төшерсен

“Тыныч күк өчен” (“Zа мирное небо”) хәйрия фонды Росгвардия белән берлектә акциянең 25 һәм 27 март көннәрен аерым билгеләде. Бу көннәрдә ау мылтыклары актив рәвештә кабул ителә.

Узган елның августында старт алган шушы акция дәвамында казанлылар 985 мылтык тапшырган инде. Алар оптоволокнодагы FPV дроннарны бәреп төшерүдә кулланыла. Автоматтан атып очучысыз очу аппаратларын бәреп төшерү катлаулырак чөнки.

25 һәм 27 мартта коралларны кабул итү Казанда Росгвардия идарәсенең (Лазарев урамы, 16) лицензия-рөхсәт бүлегендә үткәрелә. Чаллы белән Әлмәт шәһәрләрендә дә коралларны кабул итү пунктлары ачылды. Әлмәттә яшәүчеләр 26 мартта Маяковский урамындагы 114а йортка, ә Чаллыда яшәүчеләр 28 мартта Беляев урамындагы 13а йортка коралларын китерә ала.

Кабул итү пунктларына үзеңнең коралың белән алдан язылмыйча да килергә мөмкин. Паспортың һәм коралга рөхсәтең булырга тиеш. Килешү һәм кабул итү-тапшыру акты тутырыла – әлеге документлар нигезендә корал исәптән төшерелә. Ядрәләрне (патрон) дә тапшырып була.

Мылтыкны махсус хәрби операциядә катнашучы “аерым бер кешегә” яки “аерым бер частькә” дип әйтеп тә тапшыра аласыз. Хәрби частьләр вәкилләре килеп, коралларны алып китә. Сораулар өчен телефон: 8 (800) 10-16-160.

Казан мэры Илсур Метшин да акция кысаларында үзенең ИЖ-27 шома көпшәле мылтыгын һәм 250 ядрәне махсус хәрби операциядә катнашучы хәрби частькә тапшырды.

– Мылтыклар белән команданың бурычны үтәп чыгу ихтималы ике мәртәбәгә арта һәм гомер саклап калына. Егетләргә сәлам әйтегез, сезне җиңү белән көтәбез. Мылтык үзенең максатында кулланылсын, дроннарны бәреп төшерсен, ә сез өйләргә исән-сау әйләнеп кайтыгыз! – диде мэр Илсур Метшин.