Нәсел җепләре өзелмәсен: “Нәселебез шәҗәрәсе” бәйгесе старт алды

Бу хакта матбугат очрашуында «Гаилә» мәчете имам-хатыйбы һәм проектны оештыручыларның берсе Рөстәм хәзрәт Хәйруллин хәбәр итте.

Аның сүзләренчә, әлеге чараның максаты – нәсел тамырларын барлау белән генә чикләнми. «Без еш кына хәтта өченче-дүртенче буын туганнарыбызны да белеп бетермибез. Ә шәҗәрә төзү барышында гаилә бәйләнешләре ныгый, туганнар табыша, аралар якыная. Бу – үзе бер рухи хәзинә», – дип ассызыклады ул.

Конкурс 15 апрельгә кадәр дәвам итәчәк, катнашу өчен яшь чикләве каралмаган. Оештыру комитетына гаилә шәҗәрәсе (теләсә кайсы форматта), нәсел турында бер бит күләмендә инша, автор турында кыскача белешмә һәм фотоматериаллар тапшырырга кирәк.

Эшләрне 420025, Казан шәһәре, Җәүдәт Фәйзи урамы, 2 нче йорт адресы буенча китерергә яки электрон форматта kitaphane.gailya@yandex.ru адресына юлларга мөмкин.

Бәйгегә йомгак 27 апрельдә ясалачак. Җиңүчеләр мактау грамоталары һәм истәлекле бүләкләр белән бүләкләнәчәк, барлык катнашучыларга сертификатлар тапшырылачак. Иң яхшы хезмәтләр «Гаилә һәм мәктәп» журналында һәм «Мөселманнар» газетасында басылачак, шулай ук мәчеттә махсус күргәзмә оештырылачак. Моннан тыш, материаллар мәчетнең рәсми сайтында да урын алачак.

Оештыручылар фикеренчә, шәҗәрә төзү процессы үзе үк зур тәрбияви әһәмияткә ия. Ул балаларда һәм яшьләрдә үз тамырларына карата кызыксыну, хөрмәт һәм горурлык хисе тәрбияли. Рөстәм хәзрәт бер мисал да китерде: өченче сыйныфта укучы малай үзенең нәсел агачын тәкъдим иткәндә, бабалары турында шулкадәр ихлас һәм шатланып сөйләгән ки, әйтерсең лә алар белән үзе аралашып яшәгән. Бу мисал нәсел тарихын өйрәнүнең никадәр мөһим булуын тагын бер кат дәлилли.

Бәйге «Гаилә» мәчете тарафыннан ТР мөселманнары Диния нәзарәте, «Мөселманнар» газетасы, Архив эше буенча ТР Дәүләт комитеты, ТР Министрлар Кабинетының ЗАГС идарәсе, РФ Мөселман эшмәкәрләре ассоциациясе һәм «Гаилә һәм мәктәп» журналы ярдәме белән оештырыла.

Билгеле булганча, Татарстанда «Гаилә» илкүләм проекты гамәлгә ашырыла.