Парклар өчен тавыш биреп, бүләк отарга була

Татарстанда 9 елда 422 парк һәм сквер яңартылды. Татарстан Рәисе Рөстәм Миңнеханов башлангычындагы “Безнең ишегалды” республика программасы нигезендә 5 елда 1,4 миллион кеше уңай шартларга иреште.

Парклар һәм скверларны төзекләндерү “Уңайлы шәһәр мохите формалаштыру” федераль проекты һәм Татарстан Республикасының җәмәгатьчелек мохитен үстерү программасы кысаларында гамәлгә ашырыла. Халыкның 2024 елдагы тавыш бирүе файдасында быел Чаллыда Яр буе паркын (4нче чираты), Балык Бистәсендә Ленин урамында гимназия янәшәсендәге скверны төзекләндерү дәвам итә. Бөгелмәдә Ленин урамы яңартыла. Балтач районының Түбән Сосна авылында Сабантуй паркыннан Шушма елгасына кадәр җәяүлеләр юлы ясала. Арчада Банк урамы матурлана. Чистайда Ленин урамының Толстой урамыннан Нариманов урамына кадәрге өлеше төзекләндерелә. 

Казанда тавыш бирүгә 32 участок куелган. Алар арасында Кабан күле буе, Солтан-Галиев скверы, Нокса урманы бар. Шәһәр Башкарма комитеты җитәкчесе урынбасары Игорь Куляжев “эшлекле дүшәмбе” киңәшмәсендә  сөйләгәнчә, казанлыларның сүлпән тавыш бирүе сәбәбендә, башкала 2026 елда “Уңайлы шәһәр мохите формалаштыру” федераль проекты буенча федераль финанслаудан төшеп калырга да ихтимал. 

Казанның вице-мэры Денис Калинкин фикерләре белән уртаклашып, шәһәрдә 20 елда парклар белән скверларның мәйданы 5 мәртәбәгә артканлыгын әйтте. Ләкин, Казанның кайбер районнарында җәмәгатьчелек мохите җитәрлек түгел әле. “Тавыш саны җитмәү аркасында федераль проекттан финанслаудан төшеп калсак, бер дә күңелле булмас”, – диде Денис Калинкин. 

Тавыш бирү “Госуслуги” порталында һәм gorodsreda.tatar. ru аша башкарыла.

Тавыш бирүчеләр арасында 16нчы iPhone, глемпингта ял итәргә сертификат, “Руки Вверх!” төркеме һәм Надежда Кадышева концертларына билетлар уйнатыла. 12 июньдә дә тавыш бирергә мөмкин.