Парковка өчен ахырдан түләү мөмкинлеге бар

Казанда муниципаль парковкаларда 15 июньнән ахырдан түләү функциясе булдырылган иде. Мобиль элемтә эшендә өзеклекләр күзәтелү сәбәпле, ахырдан түләү (постоплата) агымдагы көннең 23:59 сәгатенә кадәр түләү башкару мөмкинлеге бирә.

– Беренче айда әлеге функциядән 44,5 мең автомобильче файдаланды. Яңа опциягә “Горпарковки” мобиль кушымтасы яки “Казанский паркинг” сайты аша кереп була. Ел ахырына кадәр “Казанский паркинг 2.0” мобиль кушымтасында да ахырдан түләү функциясе эшләп җиткереләчәк, – дип хәбәр итте Казан шәһәре Башкарма комитеты җитәкчесе урынбасары Илдар Шакиров “эшлекле дүшәмбе” киңәшмәсендә.

Моңа кадәр автомобильчеләргә ялгышлык белән күрсәтелгән автомобильнең дәүләт теркәү номерын яки парковка зонасы номерын шул көннең ахырына кадәр төзәтү-дөресләү мөмкинлеге тудырылган иде. 2024 елдан башлап бу алымны 11 меңгә якын кеше кулланган. Казандагы муниципаль парковкаларга төрле номерлы 1 миллионнан артык транспорт чарасы бер мәртәбә булса да куеп торылган.

– “Казанский паркинг 2.0” һәм “Горпарковки” кушымталарына 725 мең тирәсе автомобильче теркәлгән. Бу кушымталарны кулланучылар саны ел саен 100 меңгә арта бара. Муниципаль парковкалар оештырылганнан бирле, аларның мәйданына 36 миллионнан артык транспот чарасы куеп торылган. 2026 ел башыннан бу күрсәткеч 5,7 миллионны тәшкил итә, – диде Илдар Шакиров.

Муниципаль парковкаларга машина куюга ук 15 минут эчендә түләү башкару тиешле. Социаль биналар янындагы парковкаларда түләү башкару вакыты беренче 30 минут. Андый 32 участокта мәгълүмат тактасы сары төстә. Муниципаль парковкаларга тукталыш ясаган 5 автомобильченең дүртесе әле түләү таләп ителмәгән 15 яки 30 минут вакыт эчендә парковкадан чыгып китә.

Казанда муниципаль парковкаларда түләү атнаның эш көннәрендә 8.00 сәгатьтән 19.00 сәгатькә кадәр генә алына. Кичке һәм төнге вакытта, шулай ук ял һәм бәйрәм көннәрендә парковка – бушлай.

Парковка өчен түләүне: паркомат, СМС, “Горпарковки”, “Казанский паркинг 2.0” мобиль кушымтасы, “Карта жителя Татарстана”, шулай ук МАКС мессенджерында “Казанский паркинг” каналы аша башкарып була. QR-код та эшли.

Илдар Шакиров әйткәнчә, муниципаль парковкалардан кергән акча шәһәрдә юл билгеләре һәм светофорлар урнаштыруга, җәяүлеләр юл кичүләрен төзекләндерүгә, коймалар тотуга, юл хәрәкәте иминлеген яхшырту максатларындагы башка эшләргә юнәлтелә.