#Җәмгыять 21 август 2025, 11:01

Россия белән Кытайның чөкердәшеп, Казанда чәй эчүе дә әһәмиятле

21 август 2025, 11:01

Татарстан башкаласында 18-19 августларда “РОСТКИ: Россия – Кытай үзара файдалы хезмәттәшлек” халыкара форумы эшләде.

Скопировать ссылку

Россия белән Кытайның чөкердәшеп, Казанда чәй эчүе дә әһәмиятле

Чарага 33 илдән, Россиянең – 60, ә Кытайның 26 төбәгеннән делегацияләр килгән иде, барлыгы 10 мең кеше катнашты.
– Без инде өченче мәртәбә җыелышабыз. Шушы вакыт эчендә чара Кытай белән төрле юнәлешләрдәге уртак хезмәттәшлекне үстерү өчен бик яхшы мәйданчык булуын күрсәтте. Болар: инвестиция проектлары, машина төзелеше, энергетика, нефтьхимия, авыл хуҗалыгы, мәгълүмати технологияләр, логистика, мәгариф, мәдәният һәм туристлык, – диде Татарстан Рәисе Рөстәм Миңнеханов.

Форум кысаларында оештырылган күргәзмә белән Татарстан Республикасы Дәүләт Советы рәисе Фәрит Мөхәммәтшин да танышты.
– Татарстан Рәисе Рөстәм Миңнеханов бу форумга бик теләктәш. Кытай Халык Республикасы зур һәм куәтле. Россия төбәкләрендәге предприятиеләр вәкилләре дә Казанга килеп, Кытай делегацияләре белән күреште. Эш башы өчен шулай очрашу-аралашу зарур. Дусларча хезмәттәшлектә яшәргә кирәк, – дип фикерләре белән уртаклашты Фәрит Мөхәммәтшин.

Кызыклы яңалыкларны күзәтеп бару өчен безнең МАХ каналына кушылыгыз.

‹ ›