Рөстәм Миңнеханов: “Миңнеханов белән Әхмәтовка ошый торган әйбер балаларга ошамаска да мөмкин”

Иҗатчылар үзләрен борчыган мәсьәләләр белән уртаклашты.

– Барыгызны да бәйрәм белән! Телләр комиссиясе белән уртак эшчәнлектән күп кенә уңай үзгәрешләр күрәбез. Без тел мәсьәләсендә сезгә таянып эшлибез. Сезнең фикерләрегезне, тәкъдимнәрегезне, үтенечләрегезне игътибар белән тыңларга әзермен. Әгәр кирәк икән - ярдәм итәм, – диде Рөстәм Миңнеханов. 

Очрашуга җыелуның төп сәбәбе – тәкъдимнәрне хакимият вәкилләренә җиткерү. Быел рәис белән театр әһелләре күреште. Очрашуда шулай ук мәдәният министры Ирада Әюпова, Туган телләр комиссиясе рәисе Марат Әхмәтов, язучылар берлеге рәисе Ркаил Зәйдулла да катнашты. 

Сүзне Кәрим Тинчурин театры баш режиссеры Туфан Имаметдинов белән Нурбәк Батулла башлады. Алар Әлмәттә "Аркадаш" проекты турында сөйләделәр. Ике лаборатория дә Татарстанның милли үзенчәлекләренә багышлана. 2025 елның көзендә проект спектакльләр, мастер-класслар белән тәмамланачак.

Әлмәт театры җитәкчесе Фәридә Исмәгыйлева да форсаттан файдаланып, театрга Сәрдәр Таһировскийны баш режиссер итеп билгеләүләре өчен рәхмәт сүзләре җиткерде. Моңа өстәп, Рөстәм Миңнехановны иммерсив спектакль карарга чакырды. Рәис май аенда Әлмәткә эшлекле сәфәре барышында театрга да килергә теләвен әйтте. "Акционерлар җыелышыннан соң, "шалт" театрга! Билетлары сатып алабыз, бик кыйммәт түгелдер бит" – дип шаяртты рәис. 

Нияз Игъламов 16 нчы "Һөнәр" яшь режиссерлар фестивале турында сүз кузгатты. Фестивальнең офыкларын киңәйтүне Рөстәм Миңнеханов та хуплады.

– Миңнеханов белән Әхмәтовка ошый торган әйбер балаларга ошамаска да мөмкин. Балаларның, яшьләрнең теләкләреннән чыгып эшләргә кирәк. Яшьләргә яшьләрчә булсын, - ди рәис. 

“Апуш” студиясе кураторы Гүзәл Сибгатуллина республика җитәкчелегенә балалар театр иҗатын актив үстерүдә ярдәм иткән өчен рәхмәт белдерде. Театрны балалар арасында популярлаштыру өчен Әтнә районында белем бирү программасы белән театр лагере оештыру планлаштырыла. Моңа өстәп, Марат Әхмәтов республиканың башка районнарында да балалар театр студияләре ачарга тәкъдим итте.

Очрашуда татар театрына нигез салучы Галиәсгар Камал һәм Татарстанның халык язучысы Аяз Гыйләҗев истәлеген мәңгеләштерергә, алар хөрмәтенә һәйкәлләр куярга тәкъдим иттеләр.