Рөстәм Миңнеханов Рус теле көнен бәйрәм итүдә: Күп милләтле Татарстан халкы өчен бу бәйрәм аерым мәгънәгә и

"Барыгызны да Рус теле көне һәм бөек шагыйрь Александр Сергеевич Пушкинның тууына 227 ел тулу белән котлыйм. Бу дата рус теленең матурлыгына сокланучы, рус халкының мәдәни байлыгын саклаучы һәм арттыручыларны берләштерә» - дип башлады бүген Татарстан Рәисе Рөстәм Миңнеханов чыгышын.

Татарстан Республикасы Дәүләт Киңәшчесе Минтимер Шәймиев мәртәбәле кунак булды.

Тантанада шулай ук ТР Дәүләт Советы Рәисе вазыйфаларын башкаручы Марат Әхмәтов, ТР Дәүләт Советының Мактаулы рәисе Фәрит Мөхәммәтшин, ТР мәдәният министры Ирада Әюпова, ТР Рус милли-мәдәни берләшмәсе рәисе, ТР Иҗтимагый палатасы әгъзасы Ирина Александровская һәм башкалар катнашты.

Чара театральләштерелгән прологтан башланды.

"Күп милләтле Татарстан өчен бу бәйрәм аерым мәгънәгә ия, - диде аннары Рөстәм Миңнеханов. – Бездә рус халкының уникаль традицияләре һәм йолалары гасырлар дәвамында саклана, матур әдәбият һәм сәнгать үсеш ала, ә Казан лингвистика мәктәбе үзенең фәнни казанышлары белән дан тота. Татарстанда һәм аннан читтә Широкая Масленица, Каравон бәйрәмнәре, «Спас ярминкәсе», «Алексеевские перезвоны», «Пушкин-фест» фестивальләре, халыкара һәм бөтенроссия Кирилл-Мефодий укулары, Онегин укулары һәм башка чаралар җәмәгатьчелек тарафыннан танылды».

Рөстәм Миңнеханов Татарстанның Рус милли-мәдәни берләшмәсенә аерым рәхмәт белдерде.