“Шәһәрне төзекләндерү” предприятиесенең бу елы сөенечле башланды

– Ел башында кар бик күп яуды, ләкин транспорт хәрәкәтенең туктап калуына ирек бирелмәде.  Казанда 23 миллион квадрат метр территория җыештырыла. “Шәһәрне төзекләндерү” предприятиесенең башкала дәрәҗәсенә туры килә торган куәтле базасы булдырылды. Эшчеләр өчен уңай шартлар тудырылган, күңеле күтәренке кеше тырышып эшли ул. Димәк, эшләрнең нәтиҗәлелеге тагын да күтәрелер. Казандагы барлык юл оешмаларының да базаларын шушындый ук югары дәрәҗәгә җиткерү максат булып тора, – диде мэр Илсур Метшин.

Воровский урамындагы яңа база 2,4 гектар мәйданны били. Биредә эшчеләр өчен ял бүлмәләре, душ кабинетлары булдырылган. Махсуслаштырылган машиналарны ремонтлау җылы һәм техник җиһазландырылган цехларда башкарыла. Ремонт цехы берьюлы 12 берәмлек техникага хезмәт күрсәтә ала. Реагентлар элек Гривская урамындагы базада ачык һавада тотылса, хәзер зур ангарлар эченә урнаштырылганнар. Юл чистартып кайткан махсус машиналар җылы цехта юыла. Реагентлардан арындырылган агрегатлар күгәрми, шул рәвешле эшкә яраклылык срогы озыная.

– Авиатөзелеш һәм Яңа Савин районнарының юлларын тулысынча, ә Киров һәм Мәскәү районнары юлларының бер өлешен без кардан чистартабыз. 132 берәмлек машина исәпләнә. Техника паркын яңартудагы ярдәмнәре өчен Татарстан һәм Казан җитәкчелегенә рәхмәт! Предприятиедә 254 кеше эшли, коллективыбыз бердәм. Остазлык хәрәкәтенә әһәмият бирәбез. Яшьләргә остазлар билгеләнә, эш тәртибенә өйрәтеләләр. Бу кадрларның төпләнеп, эшләп китүенә ярдәм итә. Бездә әле тагын 17 эшчегә вакансия бар. Махсуслаштырылган транспорт чараларын идарә итүчеләрнең хезмәт хакы 130 мең сум. Татарстанда 2026 ел –Хәрби батырлык һәм хезмәт фидакарьлеге елы. Күп еллар эшләүче ветераннарга хөрмәт зур. Гривская урамындагы базада “Мактау тактасы” бар иде, аны яңа базада да урнаштырачакбыз. Тырыш эшчеләр күренеп торсын, башкаларга үрнәк булсын, – диде “Шәһәрне төзекләндерү” муниципаль унитар предприятиесе директоры Камил Закиров.

Предприятие цифрлы технологияләрне кулланышка актив рәвештә кертә.

– Эшчеләрнең теләкләрен дә өйрәнеп, техниканы ремонтлауның яңа стандартларын төзедек. Нәтиҗәдә, ремонтлау вакыты бермә-бер кыскарды. Бу урамнар юлларын җыештыруга яки кардан чистартуга күбрәк техника чыга дигән сүз, – диде “Лин Вектор” компаниясенең үсеш буенча директоры Наталья Чупина.