Салкыннар белән бергә янгыннар да артты: Татарстанда ел башыннан 21 кеше янып үлгән

– Салкын һава фронты, кызганыч ки, Татарстанда янгын очракларын да күбәйтеп җибәрде. Кешеләр электр һәм газ җиһазларын, мичләрне өйне җылыту максатларында күбрәк куллана башлады. Саклык чараларын үтәмәү еш кына фаҗигале хәлләргә китерә, – диде Россия Гадәттән тыш хәлләр министрлыгының Татарстан буенча баш идарәсе җитәкчесе урынбасары Максим Трущин “Татар-информ” мәгълүмат агентлыгында үткәрелгән матбугат конференциясендә.
Янгыннарның 79 проценты шәхси торак секторына туры килә. 

– Мунчаларда 71 янгын чыкты. Көн салкын булганлыктан, кешеләр мичкә күп итеп яга. Кирпеч мичне 1,5-2 сәгатьтән дә артык вакыт яндырып торырга ярамый. Кирпеч һәм, бигрәк тә, тимер торба кыза, шул сәбәпле мунча диварына ут каба. Мичтәге юеш утынны бензин кебек сыекчалар сибеп кыбызып җибәргәндә бик сак булырга кирәк. Сыекча шартлау барлыкка китереп, ялкынны тышка бәрә. Киемнәренә ут кабып үлүчеләр дә бар. Хатын-кызлар мич, шулай ук газ плитәсе янында кайнашканда озын чәчләрен башлык яки яулык эченә яшерсен. Чәчләренә ут кабып, тән пешүләре алучы хатын-кызлар да шактый,  – дип искәртте Максим Трущин. 

Татарстан Рәисе Рөстәм Миңнеханов теләктәшлегендә 2016-2025 елларда республикада социаль яклауга мохтаҗ  150 мең гаиләнең йортына яки фатирына 456 мең янгын хәбәре бирү аппараты урнаштырылган.

– Татарстан Рәисе, республика Хөкүмәте, муниципаль берәмлекләр җитәкчелеге ярдәмендәге социаль чараның файдасы зур – дистәләрчә кешенең гомере саклап калынды. Аппарат авазын күршеләре ишетеп, йөгереп кергән мисаллар да бар. Аппараттагы батарея “пип-пип” дигән кыска авазлар чыгара башласа, димәк, батареяны алмаштырырга кирәк. Гадәттә, батарея куәте 1 елга җитә. Социаль программаны дәвам итүне сорап, Татарстан Рәисенә хат аша мөрәҗәгать юлладык, – диде Максим Трущин.

МЧС кисәтә:
- Ватык яки кулдан ясалган электр җылыткычлары кулланмагыз;
- Электр җылыткычы өстендә киемнәр киптермәгез;
- Йортта яки фатирда газ исе сизелсә, электр утын кабызмагыз, шырпы сызмагыз;
- Бер розеткага берничә электр җиһазы тоташтырмагыз;
- Электр озынайткыч чыбыгын карават-диван һәм башка йорт җиһазлары астыннан җибәрмәгез. Озынайткыч чыбыгы тышчасы кызса, аны кулланмагыз;
- Розеткада очкын күренсә, чыбыклар ялганышын ныгытыгыз яки розетканы алмаштырыгыз;
- Мич ягуны йокларга 3 сәгать кала туктатыгыз. Электр җылыткычларын төнгә сүндерегез;
- Мич яки газ плитәсе янганда сабыйларны үзләрен генә калдырып, чыгып китмәгез;
- Спиртлы эчемлекләр кулланганнан соң, тәмәке тарткан хәлдә караватка-диванга ятмагыз;
- Кечкенә балаларга янгын очракларында өйдән чыгу кирәклеген аңлатыгыз. Өстәл астына, шкаф эченә качу ярамый.