#Җәмгыять 29 апрель 2026, 14:01

Соңгы газета укучысы һәм соңгы почтальон көннәренә калырга язмасын

29 апрель 2026, 14:01

“Татмедиа” акционерлык җәмгыятендә 2026 елның беренче яртыеллыгында газета-журналларга яздыру кампаниясендә актив эшләгән почтальоннар бүләкләнде.

Скопировать ссылку

Соңгы газета укучысы һәм соңгы почтальон көннәренә калырга язмасын

– Халыкка мәгълүмат таратуда почтальоннар белән уртак эш башкарабыз. Почтальоннар безнең ышанычлы таянычыбыз, хезмәтегез өчен рәхмәт! Нинди генә вазгыять, нинди генә проблемалар булса да, без соңгы яздырып алучыга чаклы газета һәм журналлар чыгарачакбыз, – диде “Татмедиа” акционерлык җәмгыятенең генераль директоры Шамил Садыйков.

“Россия почтасы” акционерлык җәмгыятенең “Татарстан почтасы” идарәсе җитәкчесе урынбасары Алексей Костин да хат ташучыларны мактап сөйләде.

– Почта – социаль эчтәлекле хезмәт, халык өчен эшли. Яңгыр явамы анда, буран чыкканмы, почта кешесенә илтеп җиткерелә. Татарстан өчен эшлибез, – диде Алексей Костин һәм шаяртып өстәде. – Соңгы яздыручыга да газетасын яки журналын илтеп тапшырачакбыз.

“Шәһри Казан” газетасының баш редакторы Радик Сабиров та шаян һәм моңсу да булуы ихтимал фәлсәфәне дәвам итте.

– Почтальоннар белән бергә өйдән-өйгә йөреп газетага яздырабыз. Соңгы газета яки журнал түгел, ә соңгы почтальон калганчыга кадәр газетага язылучыларны җыячакбыз. “Шәһри Казан” газетасы республика почтальоннарын чакырып, Сабан туе да үткәреп килә. Җырлап-биеп күңел ачудан тыш, почтальоннар бездә лотореяга бозау да, сарык та, куян да отты. Почта хезмәткәрләренә рәхмәт! – диде Радик Сабиров.

“Шәһри Казан” газетасына яздыруны яхшы башкарганнары өчен бу бәйрәмдә Балтач районы почтальоннары: Алсу Нәбиева, Илүзә Миңнуллина, Ландыш Камалетдинова, Эльвира Садриева “Шәһри Казан” редакциясенең махсус бүләкләренә лаек булды.

Кызыклы яңалыкларны күзәтеп бару өчен безнең МАХ каналына кушылыгыз.

‹ ›