Су ташкыны алдан хәбәр биреп йөрми

Татарстан башкаласында бу кышта 89 мм явым-төшем күзәтелде, әлеге күрсәткеч гадәттәгедән 2,5 мәртәбәгә күбрәк.

Язгы якта Казанда 12,6 квадрат километр мәйданны су басу ихтимал. Шушы территорияләргә 386 йорт керә, аларда 1,2 меңнән артык кеше яши. 

Су басу ихтималындагы бистәләр: 
Борисоглебск, Коры елга, Савиново, Красная Горка, Җиләкле бистә, Салмачы, Первомайский, Тынычлык, Царицыно, Карьер, Әке, Кече Клыки, Колсәет, Вознесенское, Константиновка, Самосыр.

– 2025 елның көзендә үк 2026 елның язгы су басуларына каршы чаралар үткәрелде. Мисал өчен, Киндери, Нокса һәм Вертелевка елгаларының агым юллары чистартылды, 680 дренаж ерганаклары тирәнәйтелде. Яңгыр-кар сулары ага торган канализация торбаларының 3,5 чакрым өлеше чүпләрдән чистартылды, – диде шәһәр Башкарма комитетының гражданнарны яклау идарәсе җитәкчесе Сергей Чанкин “эшлекле дүшәмбе” киңәшмәсендә.

Авиатөзелеш районының Кадышево бистәсендә һәм Глубокое күле янында су үткәрү торбаларының 120 метр өлеше төзекләндерелгән. Ударный һәм Верхоянский урамнарындагы торбалар яңага алмаштырылган. Идел буе районының Салмачы бистәсендә язгы су басулар ел саен күзәтелә. Биредә кар-яңгыр сулары агар өчен 400 метр озынлыкта канализация төзелгән, Хөсәен Мәүлетов урамындагы коллектор төзекләндерелгән.

– Казанда 41 гидротехник корылма исәпләнә. Чебакса бистәсендәге гидрокорылмада узган елның көзендә су биеклеге киметелде. “Түбән плотина”ның җимерелгән урыннары ныгытылды, дамбасы агачлардан арындырылды. 7нче дренаж суырту станциясендә җиһазларга капиталь төзекләндерү башкарылды, – диде Сергей Чанкин.

Су басуларга каршы шәһәр планы расланган, махсус комиссия оештырылган. Быелның март аеннан башлап елгаларның агым юллары, шулай ук ерганаклар төпләре чистартыла. Казан урамнарыннан кыш башыннан 1,5 миллион тоннадан артык кар чыгарылган, бу эш хәзер дә дәвам итә. Кискен су басулар килеп чыккан очракта Казанның һәр районында халыкны вакытлыча урнаштыру пунктлары тәгаенләнгән.

Тиз арада чаралар күрү гамәлләренә 82 эшче төркем оештырылган, аларга 123 берәмлек техника каралган. Җыелган суларны агызу өчен 112 берәмлек суырткыч, 600 басма-трап хәстәрләнгән.

Казан мэры Илсур Метшин:”Язгы су басуларга каршы әзерлек чаралары башкарылды. Нокса, Киндери һәм башка елгалардагы күперләр төзекләндерелде, әлеге корылмалар су басымына түзәргә тиеш. Шәһәрдән бөтен карны бер селтәнүдә чыгарып бетерү мөмкин түгел. Кар тиз эри башласа кече елгалар һичшиксез җанланачак. Шунлыктан без һәр төрле хәлләргә әзерлектә торырга тиеш”, – дип, мәсьәләгә җаваплы карарга чакырды.