Табигать кошлары аучылардан сак булыгыз!

Татарстанның биологик ресурслар буенча дәүләт комитеты рәисе урынбасары Рамил Шәрәфетдинов “Татар-информ” мәгълүмат агентлыгында үткәрелгән матбугат конференциясендә хәбәр иткәнчә, республикада 140 аучылык хуҗалыгы эшли.

– Бездә боланнар, куяннар саны артты. Пошилар саны – 15 мең 800 баш. Узган елгы ау чорында 915 поши атып алынды. Язгы ау чоры киек кошларга карата гына ачылды. Аучы көненә ауланган үрдәк, каз, көртлек саны 3 берәмлектән артырга тиеш түгел. Киек кошларны яшеренеп торган урыннан гына атарга рөхсәт, ә кошларга таба барып-йөреп ауларга ярамый, – диде Рамил Шәрәфетдинов.

Республикада хәзер 400 баш кабан дуңгызы исәпләнә. Берничә ел элек аларның саны 6,5 мең булган. Африка чумасы сәбәбендә, баш саны нык киметелгән. Хуҗалыкларда үрчетелгәннән соң 500 болан табигатькә иреклеккә җибәрелгән.

Татарстанның биологик ресурслар буенча дәүләт комитетының тереклек һәм үсемлек дөньясын саклау идарәсе җитәкчесе Ринат Чиспияков әйткәнчә, мылтыклар шома көпшәле генә булырга тиеш. Киек кошларны аулаганда электрон җайланмалар куллану, ау этләрен өстерү тыела. Ау эте атып төшерелгән кошны эзләп табу максатында гына кулланыла ала.

– Арча, Кукмара, Лаеш, Питрәч, Балык Бистәсе районнары урманнарында көрән аюлар бар. Аюлар инде Югары Ослан, Буа һәм Тәтеш районнары җирлекләрендә дә күренгәли башлады, – диде Ринат Чиспияков.

– Республикада аюлар 70 баш исәпләнә, алар “Кызыл китап” исемлегеннән төшерелде. Әлегә аучылар аюларга атмый. Татарстанда 617 төрдәге җәнлек һәм үсемлек “Кызыл китап” ка кертелгән, шуларның 220се – җәнлекләр, – дип өстәде Рамил Шәрәфетдинов.

“Шәһри Казан” газетасы хәбәрчесе соравына Рамил Шәрәфетдинов:”Татарстанда 60 мең аучы билеты гамәлдә. Аучылар узган ел махсус хәрби операциядә катнашучыларга Росгвардия аша 500 берәмлек ау мылтыгы, 15 мең патрон җибәрде”, – дип җавап бирде. Ау мылтыгын тапшыру акциясе дәвам итә.

Ау көннәре:  ата үрдәккә 5 апрельдән  6 майга кадәр; ата үрдәккә һәм казга 12 апрельдән 21 апрельгә кадәр; суерга, тәләттәвечкә, үрдәккә (глухарь, тетерев) 19 апрельдән 28 апрельгә кадәр. Ауга рөхсәт кәгазен Күп функцияле үзәкләрдә (МФЦ) алып була, дәүләт пошлинасы 650 сум. Ау кагыйдәләрен бозсаң, штраф 500 сумнан 4 мең сумга кадәр.