Татарстан энергетикасы күпләргә үрнәк

– Бу форум алга таба гомумфедераль әһәмияткә ия булачак. Мондый мәйдан бүген Россия өчен бик кирәкле. Энергетикадан башка бернинди икътисадның да киләчәге юк. Бөек Ватан сугышында Җиңүнең 80 еллыгы елында уза бу чара. Энергетика да җиңүгә өлеш кертте, шуның өчен ветераннарга рәхмәтлебез! – диде Татарстан Республикасы Рәисе Рөстәм Миңнеханов.

Форумда катнашучыларга Россиянең Премьер-министры Михаил Мишустинның һәм Россия Дәүләт Думасы Рәисе Вячеслав Володинның сәламләү сүзләре җиткерелде. Михаил Мишустин санкцияләр шартларында энергетика тармагында эшләүчеләрнең мондый очрашуларының зур әһәмияткә ия булуын искәртә.

– Россиядә электр энергиясенә ихтияҗның артуы күзәтелә. Илебездә электр энергетикасы корылмаларын үстерү буенча 2042 елга кадәрге чорга исәпләнелгән Генераль схема әзерләнде. Бу бик колачлы эш. СССР составындагы республикалар үз вакытында илнең энергетика тармагын торгызды, өлкән буыннар торгызган әлеге энергетика челтәре бүгенгә кадәр ышанычлы хезмәт итә. Хәзер инде безгә БДБ илләре белән бергәләшеп, энергетика тармагын яңарту бурычы тора. Өлкән буыннар кебек без дә балаларыбызга һәм оныкларыбызга ышанычлы энергетика челтәре төзеп калдырырга тиешбез, – диде Россиянең энергетика министры Сергей Цивилев.

Форум кысаларында “KazanEnergyExpo” күргәзмәсе дә эшли. Анда 3 чит илнең һәм Россиянең 17 төбәгенең предприятиеләре энергетика өлкәсенә караган продукциясен тәкъдим итә. Күргәзмәнең зур өлешен “Ике мәртәбә җиңүчеләр” (“Дважды победители”) экспозициясе алып тора. Җиңүнең 80 еллыгы шигарендәге әлеге күргәзмә энергетикларның сугыш елларындагы һәм сугыштан соңгы чордагы фидакар хезмәтен чагылдыра.

БДБ илләренең Энергетика советы утырышы планлаштырылган. Түгәрәк өстәл киңәшмәләрендә үзара хезмәттәшлек турында сөйләшүләр бара.