Татарстан Иҗтимагый палатасының рәисе итеп Александр Терентьев сайланды

Әлегә кадәр оешма белән Зилә Вәлиева җитәкчелек итте. Ул бу постта 2020 елның гыйнварыннан бирле иде.  60 кешедән торган палатаның яңа составы узган ел ахырында формалашты, анда танылган җәмәгать эшлеклеләре, табиблар, эшмәкәрләр керде. Чарада катнашкан республика Рәисе Рөстәм Миңнеханов билгеләп узганча, Иҗтимагый палатаның яңа составына абруйлы, тәҗрибәле кешеләр керде.

“Сезнең һәрберегез артында бүген үк зур эшләр тора, республика тормышында актив катнашасыз. Иҗтимагый палата белән үзара тыгыз хезмәттәшлек һәрчак безнең өстенлекләрнең берсе булды һәм шулай булып кала да. Яңа составның барлык бурычларны да җиренә җиткереп үтәчәгенә шигем юк”, – дип мөрәҗәгать итте ул аларга.  

Зилә Вәлиевага башкарган эшләре өчен рәхмәт белдереп, "Татарстан Республикасы алдындагы казанышлары өчен" орден-медален тапшырды.

“Без аның белән хакимият органнарында күптән эшлибез, һәм бу вакыт эчендә мин аны бер генә тапкыр да ачуланганым булмады”, – дип шаяртып әйтеп куйды Рөстәм Миңнеханов.  

Александр Терентьев сүзләренчә, Иҗтимагый палата ул – республика гражданлык җәмгыятенең төп институты. “Биредә иң актив һәм абруйлы кешеләр, иҗтимагый оешмалар лидерлары тәкъдим ителде. Татарстанда гамәлгә ашырыла торган күп кенә проектлар бүген гомумроссия күләмендә танылу алды, ил буенча тиражлана, һәм бу безнең Иҗтимагый палата һәм тулаем гражданнар җәмгыяте эшенең нәтиҗәлелегенең яхшы күрсәткече", – дип билгеләп үтте ул.