Татарстандагы “Хәләл” комитетының эшчәнлеге ГОСТ таләпләренә җавап бирәме?

– Росаккредитация  тикшерүчеләре безнең “Хәләл” комитеты эшчәнлеге яңа ГОСТ таләпләренә тулысынча җавап бирүен әйтте, – дип хәбәр итте Татарстан мөселманнары диния нәзарәтенең стандартлар буенча “Хәләл” комитеты җитәкчесе Аббас Шляпошников 17 мартта “Татар-информ” мәгълүмат агентлыгында үткәрелгән матбугат конференциясендә.

Россиядә 13 орган сертификат бирү белән шөгыльләнә. Шляпошников фикеренчә, аларны “сертификат органы” дип әйтү дөрес үк түгел икән. Россиядә бүгенгә бердәнбер орган – Татарстан мөселманнары диния нәзарәтенең стандартлар буенча “Хәләл” комитеты гына ГОСТ стандартларына җавап бирүче орган аккредитациясе алган.

“Хәләл” комитеты 1999 елдан эшчәнлек алып бара, аның сертификаты 22 илдә таныла. Татарстан мөселманнары диния нәзарәтенең стандартлар буенча “Хәләл” комитетының халыкара SMIIC, шулай ук Малайзиянең Ислам үсеше департаментының, Берләшкән Гарәп Әмирлекләренең Дубайдагы халыкара аккредитация үзәгенең рәсми аккредитацияләре бар.

Билгеле булганча, Татарстанда «Сәламәтлек технологиясе» илкүләм проекты гамәлгә ашырыла.