“Татарстанның милек витринасы” эшли башлады

Татарстанның Җир һәм мөлкәти мөнәсәбәтләр министрлыгы белән Инвестицион үсеш агентлыгы “Татарстан Республикасының милек витринасы” дигән уртак проект башлап җибәрде. Ул Татарстанның “Инвест портал” электрон чыганагына урнаштырылган.

Бу турыда журналистларга җир һәм мөлкәти мөнәсәбәтләр министры Азат Кадыйров белән инвестицион үсеш агентлыгы җитәкчесе Талия Миңнуллина сөйләде.

– Татарстанга инвестицияләр керә. Кайбер инвесторлар әзер бина булуын сорыйлар, чөнки җитештерү эшчәнлеген тиз вакыт аралыгында башлап җибәрергә телиләр. Иске, ягъни кулланылмаган биналар бу мәсьәләдә – безнең резерв. Шул биналарны сатып алып, анда эшчәнлек башларга була. Бинаны яки йортны җир кишәрлеге максатында сатып алырга теләүчеләр бар. Иске корылманы сүтеп, яңаны төзисең. Витринага урнаштырылган мәгълүмат тулысынча дөрес хәбәр, – диде Талия Миңнуллина.

 Республика буенча 1 мең 60 йорт яки бинаның кулланышта булмавы ачыкланган.

– Витринага сынау рәвешендә 49 йорт белән бина сатуга куелды. Болар – муниципаль карамактагы элекке хастаханә, мәктәп, машина-трактор парклары биналары. Гараж биналарында, мәсәлән, автосервис ачарга була. Биналар һәм җир кишәрлеге Россия гражданнарына гына сатыла. Чит ил гражданнары йортны яки бинаны сатып алырга мөмкин, ләкин аларга йорт-бина урнашкан җир кишәрлеге сатылмый, – диде Азат Кадыйров.

“Татарстанның милек витринасы” яңа мәгълүматлар белән тулыландырып торылачак.