Тычкан бизгәге куркынычы артты: ничек сакланырга?

Кар катламы күп булу сәбәпле кимерүчеләр күп үрчегән. Ел башыннан куркыныч авыру инде 57 кешедә ачыкланган.

Роспотребнадзорда тычкан бизгәге күп тарала торган районнарны да атадылар. Бу - Питрәч, Лаеш һәм Биектау. Бакчачыларга, табигатьтә эшләүчеләргә  аеруча сак булырга кирәк. 

Аеруча бакчачыларга, урманга йөрүчеләргә һәм авыл җирендә яшәүчеләргә игътибарлы булу мөһим.

– Тычкан бизгәге — кимерүчеләр аша тарала торган вируслы авыру, - ди Роспотребнадзорның Татарстан Республикасы идарәсе җитәкчесе урынбасары Любовь Авдонина. -Кешегә ул күбрәк: тычканнар калдырган тузанны сулаганда, азык-төлек аша яки пычранган куллар белән эләгә. Вирус турыдан-туры кеше арасында күчми, ләкин табигатьтә аны “тоту” бик җиңел.
Бу чир гадәти салкын тию кебек башланырга мөмкин: югары температура, баш һәм бил авыртуы, хәлсезлек

Ләкин соңрак ул бөерләргә зыян сала, һәм авыр очракларда: кан тамырлары зарарлана һәм эчке кан китү куркынычы туа.

Вакытында дәваланмаса, бу авыру җитди нәтиҗәләргә китерергә мөмкин.

Талпаннар да уяна: икеләтә куркыныч

Яз җитү белән талпаннар да активлаша. Алар башка куркыныч чирләр — мәсәлән, энцефалит һәм боррелиоз тарата.

– Талпан тешләвен кеше сиземичә дә калырга мөмкин, ләкин берничә көннән соң температура күтәрелә, хәл начарлана. Шуңа күрә табигатькә чыкканда саклык чаралары икеләтә мөһим, - ди Татарстан Сәламәтлек саклау министрлыгының штаттан тыш баш инфекционисты Халит Хаертынов. - Тычкан бизгәгеннән: бакчада эшләгәндә перчатка һәм маска кулланыгыз, ябык биналарны (сарай, бакча өйләре) җилләтмичә чистартмагыз, азык-төлекне ачык калдырмагыз Талпаннардан саклану өчен ябык кием киегез (озын җиң, чалбар), урманнан кайткач тәнне тикшерегез, репеллентлар кулланыгыз.

Табигать — ял итү урыны гына түгел, ә саклык таләп итүче мохит тә. Берничә гади кагыйдәне үтәп, үзегезне дә, якыннарыгызны да куркынычтан саклап кала аласыз.

Билгеле булганча, «Экологик иминлек» илкүләм проекты гамәлгә ашырыла.