«Вакыты булдымы, яраткан станогы янына чыгып китә ул»

Бүгенге героебыз агачтан ясаган әйберләре турында “кызык өчен, тик тормас өчен генә маташам” дип шаярта. Сүзем Теләче районы Баландыш авылында яшәүче Рәис Дәүләтгәрәй улы Исламов турында.

15 ел инженер, 23 ел буе бухгалтер булып эшләгән Рәис абый пенсиягә чыккач, утын агачын кырып, бизәкләп, урындык аяклары, ишек тоткалары ясый башлый. Хәзер ул бик остарып киткән: шахмат уйнау өстәлләре, фигуралары ясый. Шунысы да шаккаттыра: үз эшләнмәләрен ул сатып бирми, ә бүләк итә. Күңел өчен эшләнгән эш бит ул, ди. Рәис абый әле тагын бизәкле торт һәм җиләк-җимеш савыты, көзге рамнары һәм пычак саплары да эшли. Аңа бу кадәр осталык кайдан килгән соң, дисезме? Үзе әйтүе буенча, әтисе Дәүләтгәрәй бабай да агач эше остасы булган. Йорт җиһазлары ясаган, өйләр салган.

Ул эшләгән шахмат өстәлләре аерым бер игътибарга лаек. Аларны ул оныкларына бүләккә дип ясаган. Кара-каршы утырып уйнау өчен кечкенә урындыклары да бар. Өстәл өстендә шахмат рәтләре, саннар һәм хәрефләр – барысы да тиешенчә. Гади утын агачыннан ясалган эшләнмәләр димәссең!

Тыныч, сабыр холыклы кешеләр генә вак эшләрне җиренә җиткереп башкара аладыр. Рәис абый да шундыйлардан. 23 ел буе бухгалтер булып эшләп кара син! Яратып әйтә торган сүзе – әкрен эшен бетерер, кызу үзен бетерер. Шуңа да аның һәр эше, һәр ясаган әйбере сыйфатлы булып чыга да.

Спортны да бик ярата икән ул. Мин кунакка килгәндә хатыны Рәкыя апа белән бергә биатлон карап утыралар иде. Рәкыя апа аның турында “вакыты булдымы, яраткан станогы янына чыгып китә ул”, – дип шаярта.

Аларның танышулары турында Рәис абый кызык кына итеп: “Инженер булып эшләгәндә Баландышка килдем, шуннан Рәкыя җибәрмәде инде мине”, – дип елмая. Хезмәт сөючән, берсеннән берсе тырыш 4 бала тәрбияләп үстергән алар. Рәис абый – 7 оныгына яраткан дәү әти дә әле ул!

Рәис абый өздереп гармунда да уйнап күрсәтте. Шул чакта кайчандыр аның янына килеп “Умырзая” көен уйнарга өйрәнгәнем искә төште. Тальян гармунда уйнавы да күңел өчен икән. Беркая да махсус музыкаль белем алмаган, “уйнауның бернинди авырлыгы юк, кирәкмәгән төймәләренә генә басарга кирәкми” дип, шаяртып киңәш бирде Рәис абый.

Гади генә утын агачы Рәис абый кулына эләккәч, гаҗәеп матур җиһазга әйләнә дә куя. Ул ясаган эшләнмәләр нәкъ менә күңел җылысын салып эшләнгәнгә күрә матур булып чыгалардыр да. Агач савытлар табигыйлекләре һәм ясалу осталыклары белән башкалардан аерылып тора. Хәзерге кысаларга кертелгән тормышта Рәис абый кебек “күңел өчен” дип нәрсә дә булса эшләүче кешеләр аеручы кадерле.

Таңчулпан Гыйлаҗова.