Халык синоптигы: “Апрельдә яңгыр күп яугач, май коры килер дип шикләнәм”

Кинәт суытып, кар да төшә башлагач, күп кенә бакчачылар күңелләреннән шулай дип куйды.

Балтач районының Янгул авылында яшәүче халык синоптигы Әмир абый Шәрәфиев исә апрельдә яңгыр күп яугач, май коры килер дип шикләнә. “Менә монысы бик үк әйбәт түгел. 1990 нчы елларда берничә ел рәттән шулай булды. Агрономнарның да үзәгенә үтте ул. Печәннәр өчен дә, игеннәр өчен дә яңгыр нәкъ менә май аенда кирәк бит. Суык торгач, үләннәр дә яшәрә алмый”, - ди ул.

Аның әйтүенчә, былтыр бер ел фасылының икенчесенә кереп китүе күзәтелгән. “Узган ел җәй көзгә килеп керде, хәтерләсәгез, сентябрь җылы килде. Әбиләр чуагы бик озак булды дип әйттеләр. Җәйнең дәвамы белән әбиләр чуагы бергә кушылуы иде ул. Көз исә кышка килеп керде. Декабрь башында да җылы булды. Мартта каты суыклар булып алды. Анысын кыш язга килеп керде дим инде мин. Яз да җәйнең “өлешен” алмасын дип шикләнәм. Кар майга калмас дип тә өздереп әйтеп булмый. Күп еллык күзәтүләремә таянып әйткәндә, 9 май тирәләрендә бер кар күрсәтеп ала ул, йә кырау төшәр кебек. Шул вакытта булып калсыннар. Югыйсә май ахыры яки июнь башына калу куркынычы бар. Андый еллар да булды. Бер елны 2-3 июньдә туфрактта температура 2 градуска кадәр төште. Шулай гына була күрмәсен, бакча уңышын югалтасы килми бит”, - ди ул.