“Аллаһка шөкер, татарда өч буын фермерлар күп”

Бөтендөнья татар конгрессы Башкарма комитеты җитәкчесе Данис Шакиров журналистларга хәбәр иткәнчә, җыенга илнең 46 төбәгеннән, шулай ук Татарстаннан 900 кече бизнес вәкилләре һәм фермер хуҗалыклары җитәкчеләре җыелачак. Россиянең татар авыллары эшмәкәрләрен бер мәйданчыкка туплаган бердәнбер шундый зур чара бу, диде ул.  

Елдагыча, чараның беренче көнендә делегатлар, төркемнәргә бүленеп, фикерләшү мәйданчыклары эшендә катнашачак. 27 февральдә Апас һәм Тәтеш районына сәфәр кылачаклар. Биредә аларның фермер хуҗалыклары, эшмәкәрләр, агросәнәгать комплекслары белән танышу мөмкинлеге булачак. 

28 февральдә Татарстан Рәисе Рөстәм Миңнеханов катнашында җыенның пленар утырышы узачак. Шунда ук ил төбәкләрендә җитештерелгән продукция һәм халык кәсебе товарларыннан торган күргәзмә-ярминкә дә оештырылачак.  

Бөтендөнья татар конгрессының татар эшмәкәрләре белән эшләү бүлеге җитәкчесе Фәрит Уразаев әйтүенчә, форум алдыннан татар эшмәкәрләре уңышлы эшләп килгән берничә төбәккә барып, андагы татар эшмәкәрләре һәм фермерлар эшчәнлеге белән танышып кайтканнар.

– Хәзерге шартларда иң тотрыклы бизнес – гаилә бизнесы. Аннан кала авыл эчендәге кооперация. Аннан инде берничә авыл кооперациясе һәм төбәкара кооперация. Барып күреп кайткан төбәкләрдә без өч буын кооперациясен күрдек: әби-бабай, әти-әни һәм балалары. Аллаһка шөкер, андый кооперацияләр татарда күп. Әти-әниләрен алыштыра алырлык яңа буын килүе сөендерә. Форумга аларны да чакырдык, – диде ул. 

Пензаның Әләзән авылындагы авыл кооперациясен дә үрнәк итеп китерде Анда мал симертеп сату белән шөгыльләнәләр. Берсе үстерә, берсе чала, берсе сата. Эш шулай оештырылган. 

– Һәм алар авыл бетә димиләр. Узган ел Әләзәндә 153 бала туган, 75 кеше бакыйлыкка күчкән. Шыгырдан авылы да бетми. Аларда эш юк, яшьләр авылда калмый, дип сөйләшмиләр. Безгә шул тәҗрибәне өйрәнергә кирәк, – ди Фәрит Уразаев.    

Төбәкара кооперацияне үстерү мөһимлегенә дә басым ясады. Әлеге уңайдан каз үстерүчеләрне, ат үрчетүчеләрне, умартачыларны, бакчачыларны һәм башка юнәлештә эшләүчеләрне аерым җыеп сөйләшәчәкләрен дә әйтте.