“Элек туйда ике як туганлашкан, ә хәзер концерт карыйлар”

«Татарстанның мәдәният өлкәсендә инновацияләр кертү һәм традицияләр саклау ресурс үзәге» методисты Миләүшә Насыйбуллина билгеләп үткәнчә, республикада фестивальләр бик күп оештырыла, һәм алар  беренче чиратта онытыла барган милли йола һәм гореф-гадәтләребезне торгызу, саклау һәм киләчәк буынга тапшыру максатыннан үткәрелә. Моннан тыш алар халыкның рухын күтәрү өчен дә мөһим, диде ул.

Фестиваль быел өченче тапкыр уздырыла, әмма быел ул шактый яңа форматта тәкъдим ителәчәк, дип ышандырды Әтнә районы мәдәният бүлеге җитәкчесе Алия А​бдуллина. Чарага күрше-тирә Арча, Балтач, Биектау һәм Балык Бистәсе районнарының фольклор коллективлары да чакырылган. Алар халкыбызның туй йолаларын сәхнәләштерәчәк, диде спикер.

Фестиваль кысаларында “Әтнәнең иң уңган килене” дә ачыкланачак. Бәйгедә районның яшь киленнәре көч сынашыр дип көтелә.

“ӘтнәТуй”га килүче кунаклар сиә туй мәҗлесенә пешерелә торган махсус ризыклар белән таныша алачак. Әтнә бу яктан үзенең паштеты һәм әлбәсе белән дан тота. Кунаклар алар белән дә сыйлана алачак. Моннан тыш “Гөлҗиһан” мәйданчыгында “Чабата” биюенә өйрәтәчәкләр.

«ӘтнәТуй» фестивале оештыручысының ярдәмчесе Фаил Баязитов билгеләп узганча, туйлар банкет форматында уза башлаган чорда әлеге фестиваль бик урынлы. “Элек туйларда ике як туганлашкан, ә хәзер ике як җыелыша да концерт карыйлар. Фестивальнең бер максаты – туй турындагы менә шушы күзаллауны бераз үзгәртү, бу проблемага игътибарны арттырасы килү” ди ул.

Фестивальнең махсус кунаклары: “Риваять” этно-төркеме, ABIEM PROJECT, Татарсанның атказанган артистлары Илгиз Зәкиев, Булат Шәрипов, Алсу Хәбибуллина, ә төп кунагы – Россиянең һәм Татарстанның халык артисты Винера Ганеева.

Фото: Әтнә таңы