Финанс министрлыгы «Авыл ипотекасы» программасы шартларына үзгәреш кертте

Кредит алучы агросәнәгать комплексында, ветеринария, социаль өлкәдә эшләүче һәм шәхси эшен авыл хуҗалыгы тармагында алып баручы була ала. Тагын бер таләп – биш ел дәвамында заемщик һәр ярты ел саен банкка кайда эшләве турында хәбәр итәргә тиеш була, югыйсә банк ставканы күтәрергә хокуклы. Шулай ук әлеге кредит махсус операциядә катнашучыга яки аның хатынына бирелә.   

Әгәр дә 2023 елның 23 декабреннән гаилә ипотекасы, ИТ-ипотека, Ерак Көнчыгыш һәм Арктик ипотека кебек ташламалы федераль программаларның берәрсеннән файдаланган булсаң, авыл ипотекасын рәсмиләштереп булмаячак.

Авыл ипотекасын нинди максатларда кулланырга мөмкин?
- төзүчедән әзер яисә төзелә торган йортны сатып алу;
- икенчел базарда йорт сатып алу;
терәк торак пункт территориясендә төзүчедән (беренче милекчедән) 5 каттан да югары булмаган әзер яисә төзелә торган күпфатирлы йорттан фатир алу;
- подряд килешүе буенча йорт төзү. Ипотека бәясенә өстәмә рәвештә җир кишәрлеген кертергә мөмкин;
- үз көчең белән йорт төзү (ипотекага өстәмә рәвештә җир кишәрлеген алырга мөмкин).

Сатып алына торган торак авыл җирлегендә булырга тиеш. Мәсәлән, авыл җирлеге территориясендә, эшчеләр поселогында, шәһәр тибындагы поселокта яки халкы 30 мең кешегә кадәр булган кече шәһәр территориясендә. Мондый торак пунктлар исемлеген һәр төбәк администрациясе раслый. Сезнең торак пунктының авыл территориясе булу-булмавын тикшерергә программада катнашучы банк ярдәм итәчәк. 
Программа Мәскәү һәм Санкт-Петербург территориясендә, шулай ук шәһәр округлары территориясендә башка төбәкләрнең административ үзәкләрендә эшләми.

Андрей Савельев, Татарстан риэлторлар гильдиясе вице-президенты:
– Авыл ипотекасына үзгәрешләр нәкъ менә конкрет тармакка – авыл хуҗалыгы комплексына ярдәм итү максатыннан кертелә. Аннан файдаланырга теләп, шушы өлкәгә эшкә барырга теләүчеләр артыр дип уйлыйм. Шуның белән бу секторда икътисад та үсәчәк. 

Камияр Байтимеров, Татарстанның Фермер һәм крестьян хуҗалыклары ассоциациясе президенты:
– Авыл хуҗалыгында кадрлар мәсьәләсен ул гына хәл итә алмый. Кадрлар җәлеп итү ысулы буларак, аның өлеше бер 30 процентны тәшкил итәдер. Калган 70 процентына эш урыны белән тәэмин итү, лаеклы хезмәт хакы түләү һәм башка мәсьәләләр карый. Бу проблема комплекслы якын килүне таләп итә.