“Мал сатучы алыпсатарларны тәүлек буе күзәтергә кирәк”

Республиканың ветеринария хезмәткәрләре Корбан бәйрәменә Ураза гаетеннән соң ук әзерләнә башлады. Корбан чалу мәйданчыкларын хәстәрләү һәм биологик калдыкларны утильләштерүгә кагылышлы мәсьәләләр алдан ук хәл ителеп куела. Ә инде корбанлыкка килгәндә, белгечләр сарыкларны чит төбәкләрдән кертмәскә өнди. Экология, табигатьтән файдалану, агросәнәгать һәм азык-төлек сәясәте комитетының һәм комитет каршындагы эксперт советының уртак утырышында да күтәрелде бу мәсьәлә.

Республика территриясенә куркыныч терлек авырулары кертмәс өчен аеруча уяу булу таләп ителә. Язын авыл хуҗалыгы терлекләрен сатуның соры базары активлаша, дип белдерде Татарстан Дәүләт Советының Экология, табигатьтән файдалану, агросәнәгать һәм азык-төлек сәясәте комитеты рәисе урынбасары Нәҗип Хәҗипов. Дәүләт Советы Рәисе вазифаларын башкаручы Марат Әхмәтов сүзләренчә, республикада моның белән профессиональ рәвештә шөгыльләнә торган 100-120 кеше бар. “Һәм аларны контрольдә тотарга, көнме ул, төнме, бу кешеләрне күзәтеп тору өчен районнарда сезнең белгечләрегезне беркетергә кирәк", – дип мөрәҗәгать итте ул Татарстанның Баш ветеринария идарәсе башлыгы Тимур Галиевка.

Ведомство башлыгы әйтүенчә, Татарстанның үзенең – 148 һәм күрше төбәкләрдән тагын 40 алыпсатар барлыгы билгеле. Ветеринария белешмәсеннән башка терлек кертүне тикшереп тора торган постлар эшли.

– Бүгенге көнгә 2,5 мең берәмлектән артык транспорт тикшерелгән, өстәмә рәвештә тагын 19 күчмә пост урнаштырдык, ике стационар пост эшли. Республикага 190 баш эре мөгезле терлек кертү ачыкланды, бүген генә мөгезле вак терлек кертүне булдырмый калдык. Корбан бәйрәме уңаеннан урау юллары белән терлек ташу башлана, – дип белдерде Тимур Галиев.
Ветеринария хезмәткәрләре, йогышлы авырулар үтеп керүне булдырмау максатларында, гаеткә сарыкларны үзебезнең Татарстаннан гына алырга киңәш итә. Татарстан мөселманнарының диния нәзарәтендә узган Корбан гаетен оештыру буенча эшлекле киңәшмә Баш ветеринария идарәсе башлыгы урынбасары Габделхак Мотыйгуллин билгеләп үткәнчә, малларны кертү Баш ветеринария идарәсе белән килештереп кенә башкарыла. Республикага кертелгәннән соң, тиешле районның яисә шәһәрнең ветеринария хезмәтенә хәбәр итү шарт. Терлекләрнең һәр партиясенә ветеринария документы һәм хайваннар “Хорриот” системасына кертелгән һәм колак биркалары булырга тиеш.