“Наным, зинһар яза күрмәгез. Безнең авылда андый хатын-кызлар күп”

– Наным, зинһар яза күрмәгез. Аның кадәр сенсация түгел бит ул, безнең авылда күп хатын-кызлар трактор йөртә, – дип сүзен башлады ул, үзенә шалтыраткач. – Видеога төшергәннәрен белми дә калдым. Мондый кар ишеп яуган көннәрдә читтә калып булмый. Тракторлары булган егетләр дә кар чистартырга чыга, сезнең газета аша Айдар Ибраһимовка, Илнур Шәйхетдиновка, Илһам Зиннәтуллинга, Роберт Шакирҗановка, Рөстәм Гайнетдиновка, Илнур Әхмәтшакировка, Радик Закировка, Рамил Назыйровка рәхмәтемне әйтим әле.  

Фирая ханымның авыл башлыгы булып эшли башлаганына быел егерме ел була икән. Бу җаваплы эшкә алынганда 35 яшендә генә булган.

– Тормыш иптәшем бик булышты, кызганыч, үлеп киткәненә ике ел булды, таянычым иде, – ди ул.

Тракторны йөртүгә килгәндә, аның бер авырлыгын да күрми. Бер ягында тормоз, икенче ягында газ, үзе велосипед кебек җиңел генә, ди. Хуҗалыкта эшләр килеп чыкканда, авырсынып тормыйча, трактор руле артына үзе дә утыра. Бу юлы янгын сүндерүчеләр гидрантларны карарга киләсе булганнар. Алар килешкә чистартып куйыйк дип, руль артына утырган булган һәм шуннан кадрга да эләккән. Бу видеоны район газетасы сайтыннан күреп алып, үзе дә шаккаткан.  
Авыл урамнарын кардан чистарту өчен авыл советы бер шәхси эшмәкәр белән килешү төзегән. Биш авылны ике трактор чистарта. Әмма кайвакыт аларны гына көтеп утырып булмый, тракторы булган егетләр дә булыша икән. Авыл эчендге юллар гына да 22 чакрымны тәшкил итә. Басу юлларын да исәпләсәң, 30 чакрымга җыела. Кыш башыннан юлларны кардан чистартырга гына да 250 мең сум акча тотылган. Тракторчыларга көненә 12 сәгать тә эшләргә туры килә икән.

– Анысына да рәхмәт, юл оешмалары юлларны кардан чистарту өчен килешү төзергә атлыгып тормыйлар, чөнки аларның зур тракторлары тар урамнарга керә алмый. Быел кар күп яуды дибез. Бер ун еллар элек аннан да күбрәк иде. Безнең бер авыл чокырга урнашкан. Кар шул чокырны тутырды да куйды. Үзебезнең көч кенә җитмәгәч, Казаннан авыр хәрби техника кайтарырга туры килде, – дип искә ала Фирая ханым.

“Кар куярга урын калдымы соң?” дип шаяртып соравыма, тагын яуса, тар урамнар нишләп бетәр дип борчылабыз, тракторчы егетләр дә кар эттереп булмый, диләр, кайберләренең өйләре дә күренми инде, ди ул.