«Серле сандык» ябылмый: Алсу Әгьләмова милли гореф-гадәтләрне барлап йөри

Әмма проект авторы Алсу Әгьләмова моны тәмамлану түгел, ә яңа башлангыч дип саный.

Алсу Татарстан Аграр яшьләр берләшмәсенең грантлар конкурсында җиңеп, үзенең күптәнге хыялын тормышка ашырган. Бу адымга аны ире Айнур Әгьләмов этәргән. Берничә ел элек ул үзе дә грант ярдәме белән Мамадыш районында креатив чаналар фестивален уңышлы үткәргән булган.

– Грантлар кешеләрнең кызыклы идеяләрен тормышка ашырырга мөмкинлек бирә. Мин дә үз көчемне сынап карарга булдым. Бу тема миңа бик якын, – ди Алсу.

Проект кысаларында ул Мамадыш, Алабуга, Кукмара һәм Балык Бистәсе районнарында булып, татар, рус, керәшен, удмурт һәм мари хатын-кызлары белән очрашкан. Алар милли ризыклар пешергән, гореф-гадәтләр белән танышкан, буыннан-буынга килгән гаилә традицияләре турында сөйләшкән.

Алабуга районының Олы Шурняк авылында Алсу керәшен мәдәниятенә кагылышлы күп яңалык ачкан. Авыл хуҗабикәләре белән бергәләп пирмәнкә, казан бәкәнәсе һәм шишәрә әзерләгәннәр.

Проектның иң истәлекле мизгелләренең берсе Алсуның әнисе катнашында узган. Ул кызына һәм башка катнашучыларга өй токмачын кисү серләрен өйрәткән. Бу күренеш күпләр өчен буыннар бәйләнешенең, гаилә җылылыгының матур символына әверелгән. Проектта Алсуның кызы да катнашкан, шуңа күрә «Серле сандык» чын мәгънәсендә гаилә проекты булып чыккан.

Белеме буенча Алсу – математика укытучысы. Соңгы елларда ул визажист булып эшли. Әмма аның фикеренчә, кешенең чын матурлыгы тышкы кыяфәттә генә түгел.

– Коучлар да, психологлар да, интернеттагы киңәшләр дә безнең әби-бабайлардан килгән тормыш тәҗрибәсен алыштыра алмый. Тамырларыбызга таянганда гына күңелдә тынычлык һәм гармония туа, – ди ул.

Алсу – ике бала әнисе. Аның сүзләренчә, хатын-кыз өчен иң мөһиме – эчке тынычлыкны саклау. Моның өчен һәркемнең күңеленә якын шөгыле булырга тиеш.

Үзе ул чәчәкләр үстерергә ярата. Табигать белән аралашу аңа көч һәм илһам бирә. Социаль челтәрләрдә вакыт үткәрүгә караганда, чәчәкләр тәрбияләү күпкә файдалырак, дип саный ул.

Хәзер инде Алсуның яңа хыялы бар. Ул Мамадышта хатын-кызлар өчен иҗади аралашу үзәге булдыру турында уйлый. Анда милли кул эшләре белән шөгыльләнергә, тәҗрибә уртаклашырга, яңа дуслар табарга һәм күңел тынычлыгы алырга мөмкин булачак.

«Серле сандык» проекты тәмамланса да, аның төп кыйммәте саклана: милли традицияләрне барлау, буыннар арасындагы бәйләнешне ныгыту һәм төрле милләт вәкилләрен уртак кыйммәтләр тирәсендә берләштерү.