Татарстанда җыелган уңышның 60 проценттан артыгы азык-төлеккә яраксыз булып чыккан

Нигездә, бу бодай, арпа, солы. Продукция Әзәрбайҗан, Казахстан, Иран, Гыйрак һәм Грузиягә озатылган.

– Быел уңыш югары булды. Эчке куллануга 3 миллион тоннага якын ашлык китә. Артыгы экспортка яки башка төбәкләргә җибәрелә. Ил эчендә 1 миллион тоннага якын ашлык Россиянең башка төбәкләренә озатыла. Майлы культуралар Европа илләренә – Испания, Польша, Чехия, Германия, Италиягә китә. Быел Төркиягә, Монголиягә һәм Белоруссиягә дә озатылды, – дип белдерде Россельхознадзорның Татарстан Республикасы буенча идарәсе җитәкчесе урынбасары Айрат Таҗетдинов матбугат очрашуында.

Быел беренче тапкыр Кытайга солы һәм җитен экспортланган. «Агросәнәгать комплексы продукциясенең сыйфатын һәм куркынычсызлыгын бәяләү федераль үзәге» филиалы директоры Татьяна Менликиева хәбәр итүенчә, быел Татарстанда җыелган уңышның 60 проценттан артыгы азык-төлеккә яраксыз булып чыккан.

– Безнең филиал ашлыкның 100 процентка якынын тикшерде.Барлыгы 5,5 мең проба сайлап алды. 105 меңнән артык тикшеренү үткәрелде. Тикшеренүләр нәтиҗәләре күрсәткәнчә, 10 проценты – өченче класс бодай, 27 проценты – дүртенче класс, 60 проценты – бишенчн клас бодай. Быел картина шундый: азык өчен кулланыла торган бодай азык-төлеккә яраксызына караганда кимрәк, – диде ул.