Терлегең системада исәптә юк икән, сөтеңне тапшыра алмыйсың

Татарстан Министрлар Кабинетының баш ветеринария идарәсе башлыгы урынбасары Илдар Ногманов әйтүенчә, халык моны аңлап кабул китә. Алай да идарәгә шикләнеп шалтыратучы булган анысы. Гаеп итеп тә булмый, авыл халкы элекке вакытлардагы кебек баш санына карап салым түләттермәгәйләре дип шикләнә.
– 2018 елдан ит һәм сөт тапшыручылар, аларны сатучылар “Меркурий” системасына кертелде. Хәзер кирәкле бар мәгълүматны электрон формада табып була. Ай саен ветеринарлар терлекнең санын күрсәтеп, куркынычсыз продукт дип, белешмә яза. Бөтен нәрсәне ачыктан-ачык күреп була дип әйтәсем килә. Бу системадан да шикләнергә кирәкми, – ди ул. 

Терлекләрнең колагына беркетелгән чиптагы саннар да бердәм мәгълүмат базасына кертелә. Шуның ярдәмендә аның кайчан туган булуы, нинди прививкалар ясатылуы турында махсус аппарат аша “укып була”. 2024 елның 1 мартына кадәр ветеринарлар шәхси хуҗалыктагы бөтен мөгезле эре терлекләргә дә биркалар элеп чыгарга планлаштыра. Аннары чират атларга, сарыкларга һәм кәҗәләргә. Кош-кортлар да, бал кортлары да читтә калмаячак. 
Идентификацияләүдән баш тарткан очракта нәрсә була дигән сорау туарга мөмкин. Бердән, быел ул бушка. Киләсе елга биркаларны сатып алырга туры киләчәк.

– Иң мөһиме – андый терлекләрне сугым цехына кабул итмәячәкләр. Биркасы юк икән, карантинга ябалар. Карантинда булдымы, сөтен тапшыра да, сата да алмыйсың. Көтүгә дә чыгарырга ярамый, бәлки аңарда нинди дә булса авыру бардыр. Биркасы булса, бердәм мәгълүмат базасыннан аңа ясалган прививкалар турында белеп булыр иде, – ди Илдар Ногманов.

Терлек сатып алганда да игътибарлы булырга кирәк. Биркасы юк икән, алмаска. Ни өчен дигәндә, ул авыру булган төбәкләрдән кайтарылырга мөмкин. Документлары булмаган терлек кертү очраклары да булгалый, ди идарә җитәкчесе урынбасары. 

Малларны идентификацияләү ветеринарларның эшен дә җиңеләйтә. Һәр сыерга ясатылган прививка турында, ә ул елына дистәләп була, кулдан тутырган булсалар, хәзер ул програмамга гына кертелеп барачак. Ветеринарның кәгазь эше кими дигән сүз бу.