“Тулбай авылының халык артисты” исемен бирерлек»: сәхнә тотты Тулбай бөркетләре!

Программа тулысынча егетләр тарафыннан әзерләнгән иде. Алар җыр-биюләре, юмористик сәхнәләштерелгән номерлары белән тамашачыларның күңелен яулады. Бәйрәм башыннан ук залда җылы мохит хөкем сөрде. Һәр чыгыштан соң тамашачыларның кайнар алкышлары тынмады.

Марат Маликов, Наил Шәйхетдинов, Назим Ямалиев, баянчыбыз Ринат Имаметдинов башкаруындагы лирик җырлар аналарның һәм кызларның күңелен нечкәртсә, Айнур Гатинның, кунак егете Рамазан Крашевның биюләре дәртләндерде. Айрат һәм Альмир Гатиннарның кызыклы чыгышы залны көлдерде.Әниләргә, хатын -кызларга багышланган шигырьләрне Айрат Гатин, Илгизәр Сабиров, Илгиз Загиев куңелгә үтәрлек итеп укыдылар. Минзәләдән килгән кунак егетебез Илнур Авзаловның һәр чыгышы “Тулбай авылының халык артисты” исемен бирерлек итеп алкышка кумелде. Тамашачылар концерттан зур канәгатьләнү алып, күтәренке кәеф белән таралдылар. 

Концерт бөтен яклап уйланылган иде. Матурлыкка дан, хатын-кызга хөрмәт, Әниләргә игелеклелек турында видеосюжетлар залда алышып торды. Хәрби операциядәге егетләребез Ринат Гатин, Рамил Фатыйхов, армия сафларындагы егетебез Камил Мөбәрәковның әниләренә, апаларына чәчәк бәйләмнәре дә тапшырдылар егетләр. Аларның тиздән Жиңү белән кайтуларын теләп алкышлады халык.

Концертны әзерләуче, егетләрне сәхнәгә менгерүче, алып баручы, көлдеруче, елатучы режиссер һәм продюсер Илгиз Загиев иде. Илгизне данлы эшмәкәр итеп кенә тугел, киләчәктә «Тулбай бөркетләре” ансамбле житәкчесе булып район, республика сәхнәләрендә дә күрәсебез килә әле.

Кичәдән соң "Тулбай егетләре сәхнә тотты!" дигән сүзләр бүген һәркемнең телендә иде. Бәйрәм кичәсе авылдашларның бердәмлеген, ир-атларыбызның хөрмәтен һәм талантын тагын бер кат исбатлады. Рәхмәт, егетләр! Тормыш парларын Тулбай егетләре итеп сайлавыбызга тагын бер кат горурланып, шатланып утырдык. Егетләребез бәйрәмгә иң матур истәлекле бүләк сайлаганнар. Рәхмәтебез чиксез!

Светлана Сабирова