Күңелеңне дәвалыйсың килсә, зиратка бар

Казандагы зиратларда ташландык хәлдәге каберләрне күргәч, җан әрни. Бакыйлыкка күчкән бу кешенең фани дөньяда кеме дә булса бардыр, ләбаса. Ләкин, гаеп ташлап, гөнаһка керү дә ярамас.  Гаиләсез, нәсел тамыры өзелгән, карындаш яки буын туганнары еракта яшәгән бичара бәндәләр дә шактый бит.

Балык Бистәсе районындагы Балтач, Ямаш һәм Күки авылларында халык, яз саен җыйнаулашып, зиратларда өмәләр оештыра. Өмәләргә авылларныкылар гына җыелмый, ә районнарда һәм шәһәрләрдә яшәүчеләр дә кайта.

– Җиңүнең 80 еллыгына багышланды быелгы өмә. Бөек Ватан сугышында катнашкан ветераннарның каберләрен чүп үләннәреннән чистарттык. Махсус хәрби операциядә һәлак булган ир-егетләребезнең каберләре дә тәртиптә тотыла. “Бу минем туганым түгел”, дигән сүз юк. Һәр каберне җыйнаулашып җыештырабыз. Зиратның борынгы өлешендәге карт агачлар кисеп алынды. Каберләргә биек булып үсә торган агачлар утырту гадәтен туктатасы иде, кечкенә куаклар яки чәчәкләр генә утырту кирәк. Биек агачлар картайгач, каберләр өстенә ава башлый, ташларны вата. Балтач авылы зиратында өмә ике көн дәвамында барды. Халык өмәгә бердәм булып килде, рәхмәт! – диде Балтач җирле үзидарәсе рәисе Харис Гатиятов.

Эшкуар Азат Хаҗиев өмәдә катнашучыларны пылау һәм чәй белән сыйлады. Өмәдә студент-яшьләрнең, мәктәпләрнең өлкән сыйныфлар укучыларының күп булуы күзгә ташланды.

– Өлкән сыйныфлар укучыларының үз ихтыярларында өмәгә килүләре мактауга лаек. Мондый чаралар ватанпәрвәрлек тәрбиясе дә ул, балалар Бөек Ватан сугышы ветераннары һәм махсус хәрби операциядә һәлак булган авылдашлары каберләренә хөрмәт күрсәтелүен күреп, хәтеренә сеңдерә. Бала инде үсеп җиткәч тә туганнарының каберен, зиратны карап-хәстәрләп тоту зарурлыгын онытмый, – диде Балтач авылы мәктәбе директоры Нияз Гарипов.

Өмәдән соң зират яктырып, матурланып калды. Әрвахларның да рухлары шатлангандыр, мөгаен.

Билгеле булганча, Татарстан Рәисе Рөстәм Миңнеханов фәрманы нигезендә, Бөек Жиңүнең 80 еллыгы уңаеннан, республикада яшәүче һәр сугыш, тыл ветераннары игътибар үзәгендә.