Мөхәммәтшин Мамадыш районы ветераннарына Җиңүнең 80 еллыгы юбилей медальләрен тапшырды

Бүген Дәүләт Советы Рәисе Фәрит Мөхәммәтшин Мамадыш районына эш сәфәрендә, анда ул район Советының хисап сессиясендә катнаша. Сәфәр кысаларында парламент җитәкчесе Мамадыш районы ветераннары Валентина Лаптевага, Валерий Классенга һәм Хәсән Шәрәфетдиновка «1941-1945 еллардагы Бөек Ватан сугышында Җиңүгә 80 ел» юбилей медальләрен тапшырды. Фәрит Мөхәммәтшин ветераннарны Бөек Җиңү юбилее белән котлады, ныклы сәламәтлек, уңышлар һәм иминлек теләде.  

Валентина Лаптева балачактан ук сугыш авырлыкларын татыган. Әтисен фашистлар басып керүнең беренче көннәреннән үк диярлек фронтка алалар, ул 1944 елның июнендә хәбәрсез югала. Витебск өлкәсенең Валентина Леонидовна туган Альховик авылында сугышка кадәр 112 йорт исәпләнгән, 450 дән артык кеше яшәгән. Сугыш вакытында 104 йорт юк ителә, ә аннары авыл тулысынча яндырыла. Ике ел, 1942 елдан 1944 елга кадәр, Валентина Лаптева әнисе һәм энесе белән Минск өлкәсенең Борисов шәһәренең оккупацияләнгән территориясендә яши. Анда берьюлы 4 лагерь урнашкан була – хезмәт лагере, ике хәрби әсирләр лагере һәм штраф лагере. Валентина Леонидовна – фашистлар лагерьларының балигъ булмаган тоткыны. 1944 елда аларны туган авылларына, төгәлрәге, кайчандыр ныклы хуҗалыктан хәрабәләр генә калган җиргә алып кайталар. Алар җирне чокып ясалган өйләрдә яшиләр һәм Җиңүне көтәлә. 1968 елда Валентина Леонидовна Мамадышка килә, кияүгә чыга, ул үстерә.

Валерий Иванович Классенның тормышы сугыш һәм камалышта калган Ленинградтан башлана. Ул 1941 елның 6 апрелендә туган, ә 22 июньдә сугыш башланган, 8 сентябрьдә  – шәһәр камалышы һәм 1942 елның март ахырында гына гаилә эвакуацияләнә. Валерий Ивановичка «Блокададагы Ленинградта яшәүче» күкрәк билгесе тапшырылды.

Агымдагы елның августында Хәсән Галәветдин улы Шәрәфетдиновка 100 яшь тула. Армиягә аны 1943 елда алалар. Өйрәнүләрдән соң ул Ханка күле буенда урнашкан кавалерия дивизиясенең атлы полкына эләгә. Монда Хәсән Шәрәфетдинов 1945 елга кадәр хезмәт итә. 1945 нче елның июлендә Япония белән сугышта катнаша. 1948 елның мартында туган ягына кайта һәм пенсиягә чыкканчы колхозда эшли. 

Бөек Ватан сугышы елларында 700 меңгә якын татарстанлы фронтка чакырылган, шул ук вакытта аларның һәр икенчесе диярлек һәлак булган яки хәбәрсез югалган. Республикабызның 200 меңнән артык кешесе күрсәткән батырлыклары өчен орден-медальләр белән бүләкләнгән. 

Бүген үк Валентина Лаптевага, Валерий Классенга һәм Хәсән Шәрәфетдиновка «Татарстан Республикасы Мамадыш муниципаль районының мактаулы гражданины» медальләрен тапшырдылар.