Бу көнне хаҗ имамы артында зухр һәм икенде намазлары бергә кушып укыла

Габдуллаһ ибн Габбас фикеренчә, атаманың икенче сәбәбе дә бар: Ибраһим пәйгамбәргә хаҗ йолаларын өйрәтеп бетергәч, Җәбраил: «Хәзер син аларны таныдыңмы?» - дип сораган. Ибраһим пәйгамбәр ризалык белдереп җавап биргән.

Риваятьләргә караганда, Адәм белән Хәва Гарәфә көнендә, икенде намазы вакыты кергәч, Гарәфәт тавында очрашканнар. Аларның догалары белән Аллаһы Тәгалә һәр елны шушы көнне бу урында җыелучы аларның оныкларын гафу итәргә вәгъдә иткән. Шуңа күрә Гарәфә көнендә күп дога кылу бик саваплы.

Гарәфәт - изге урын, ләкин ул Харам чигеннән читтә урнашкан. Ул Мәсҗид әл-Харамнән якынча 22 чакрым ераклыкта. Аның мәйданы — 104 км², чикләре махсус билгеләр белән күрсәтелгән.

Хаҗилар зөлхиҗҗәнең 9 нчы көнендә Гарәфәттә тукталалар. Бу көнне хаҗ имамы артында зухр һәм икенде намазлары бергә кушып укыла.
Гомәр хәлифә сүзләренә караганда, түбәндәге аять нәкъ менә Гарәфәттә иңгән:
«Бүген Мин сезнең динегезне камил иттем, Сезгә булган нигъмәтемне тулыландырып бетердем һәм Исламны сезнең динегез итеп разый булдым» («Мәидә» сүрәсе, 3 аять).

Гарәфәттә Җәбәлүр-Рәхмә (Рәхмәт тавы) дип аталган калкулык бар. Пәйгамбәребез Мөхәммәд шунда тукталып, Аллаһка дога кылган.Бүгенге көндә Гарәфәттә, атмосфераны йомшарту һәм һаваны суыту өчен, су сиптергечләр урнаштырылган - алар сәгатенә якынча 140 литр су тарата. Хаҗиларга күләгә булсын өчен 100 000 нән артык агач утыртылган.

“Мөхәммәдия” мәдрәсәсе мөгаллиме Айрат хәзрәт Яруллин