Дөнья малы: кемгә рәхмәт, кемгә хәсрәт (ВИДЕО)

Аллаһы Тәгалә  җирдәге бөтен тереклек иясен дә ризыкландыручы. Хәтта Иблиснең дә ризыгы Аның кулында. Бер хәдистә Пәйгамбәребез: "Көннәрдән бер көнне Иблис Аллаһы Тәгаләгә, йа Раббым, син һәр мәхлугыңның ризыгын һәм тормышын билгеләдең, ә минем ризыгым кая, дип сорый. Аллаһ аңа, минем исемем искә алынмый ашалган ризык синеке булыр, дип әйтә", - ди.

Аллаһ кемгә дә булса күп ризык биреп, Ул бу кешене зурлый, ярата, ә ризыкны киметеп биргән кешене кимсетә дип уйлау дөрес түгел. Мисал өчен: яраткан мәхлугы Мөхәммәд пәйгамбәрнең ике көн рәттән арыш ипиен туйганчы ашаганы булмаган. Шул ук вакытта мал-мөлкәтне Аллаһ кемнедер олылау, ә кемнедер хәсрәткә батыру өчен дә бирә.