Фитыр сәдакасының күләме билгеле

18 февральдә, кояш баеганнан соң, рамазан ае керә. Моңа бәйле рәвештә, Татарстан диния нәзарәте тарафыннан фитыр сәдакасы, фидия һәм нисаб күләме буенча карарлар кабул ителде.

Фитыр сәдакасын түләү өчен нисаб күләме – 120 мең сум (көмеш буенча), зәкят чыгару өчен нисаб күләме – 940 мең сум (алтын буенча) билгеләнде. Фитыр сәдакасының минималь күләме – 200 сум, зәкят чыгарырлык байлыгы булган кешеләргә – 1200 сум. Моннан тыш, сәламәтлеккә бәйле рәвештә ураза тоту мөмкинлегенә ия булмаган һәм аны башка вакытта да, каза кылып, үти алмаучылар өчен тотылмый калган һәр көн өчен 450 сум күләмендә фидия билгеләнде.
Рамазан уразасы 19 февральдә тотыла башлый. Беренче тәравих намазы 18 февральдә ястү намазыннан соң укыла. Татарстан мәчетләрендә тәравих намазы хәнәфи мәзһәбе буенча 20 рәкәгать итеп үтәлә. Кадер кичәсе – 16 мартта.

Быел ураза 29 көн тотыла. Уразаның соңгы көне – 19 мартта.
Ураза бәйрәме быел 20 мартка (җомга) туры килә. Татарстан шәһәрләре өчен: сәгать 6.30да – Коръән уку, сәгать 7.00дә – вәгазь, сәгать 7:30да – гает намазы. Авыл җирлекләрендә гает намазын кояш чыгып ярты сәгать вакыт узгач уку тәкъдим ителә.

2026 елда дини бәйрәмнәр һәм хөрмәтле кичәләр 
2 нән 3 февральгә каршы төн – Бәраәт кичәсе
18  февраль – беренче тәравих намазы
19 февраль – Рамазан ае башлану (беренче көн ураза)
20 март – Ураза гаете
26 май – Гарафә көне 
27 май – Корбан гаете 
26-30 май – тәкъбир әт-Тәшрикь көннәре
16 июнь – мөхаррәм аеның беренче көне, һиҗри буенча 1448 нче ел башлана
25 июнь – Гашура көне
14 август – рабигуль-әүвәл аеның беренче көне, Мәүлид ае башлана
24еннән 25 августка каршы төн – Мәүлид ән-Нәби кичәсе

Дилбәр Гарифуллина әзерләде