Казанда Татарстан мөселманнары диния нәзарәте корылтае үтә

Аның эшендә Татарстан Рәисе Рөстәм Миңнеханов, Татарстан Мөфтие Камил хәзрәт Сәмигуллин, республиканың 1520 имамы, ТР Дәүләт Советы Рәисе урынбасары, ТР Рәисе каршындагы Татар телен һәм Татарстанда яшәүче халыклар вәкилләренең туган телләрен саклау һәм үстерү комиссиясе рәисе Марат Әхмәтов, ТР Рәисе Аппараты вәкилләре, министрлар, эре оешма җитәкчеләре, район һәм шәһәрләр башлыклары, массакүләм мәгълүмат чаралары вәкилләре катнаша. 

Корылтайның көн тәртибендәге төп мәсьәләләргә Татарстан Мөфтиен һәм Татарстан Баш казыен сайлау, нәзарәтнең соңгы 4 елдагы эшчәнлегенә йомгак ясау һәм башкалар керә. 

Корылтай утырышы "Казан Экспо" Халыкара күргәзмәләр үзәгенең И.Шакиров исемендәге концертлар залында узачак һәм, Коръән аятьләрен укып дога кылудан башланып китәчәк. Делегатларны һәм кунакларны беренче булып республика мөфтие Камил хәзрәт Сәмигуллин сәламләячәк, ул хисап чорында диния нәзарәте эшчәнлеге турында хисап белән чыгачак.

Көн тәртибендәге Татарстан Республикасы мөфтиен сайлау турындагы мәсьәлә буенча ТР мөселманнары Диния нәзарәтенең 2025 елның 15 гыйнварында узган Пленумы карары белән кандидат булып Камил хәзрәт Сәмигуллин күрсәтелде. Камил хәзрәткә 40 яшь, ул – Коръән-хафиз, ислам фәннәре докторы, 30 га якын иҗазәт иясе, Хәнәфи мәзһәбе галиме, матуриди, татар, иске татар, гарәп һәм төрек телләрен белә, 20 дини китап авторы, тәрҗемәчесе һәм автордашы, Диния нәзарәтенең күпсанлы башлангычларын эшләтеп җибәрүче, өйләнгән, 4 бала атасы.

Татарстан Мөфтиен сайлаганнан соң, Татарстан Рәисе Рөстәм Миңнехановка сүз биреләчәк. 
Аннан соң Татарстан Баш казые сайланачак. Нәзарәтнең 2025 елның 15 гыйнварында узган Пленумында тавыш бирү нәтиҗәсендә ТР Баш казыена кандидат итеп Җәлил хәзрәт Фазлыев расланды. 

Камил хәзрәт һәм Җәлил хәзрәт кандидатлар итеп барлык районнарда узган мөхтәсибәт җыелышларында тәкъдим ителгән иде.
Корылтай "Казан Экспо" Халыкара күргәзмәләр үзәге мәйданчыкларында җәмәгать намазы белән тәмамланачак. 1520 имам икенде намазын Татарстан Мөфтие Камил хәзрәт Сәмигуллинга ияреп укыячак. Аннан барлык делегатлар 13 нче Республикакүләм ифтарда катнашачак.