Нәфел намазларын икендедән соң уку – мәкруһ

– Җәй көннәрендә, бигрәк тә авыл халкы, ястү намазы кергәнне көтеп тормыйча, аны иртәрәк укый. Иртән торалар, көне буе эшләп арыйлар дигәндәй. Әмма бу сәбәп була аламы? 
– Татарстан җирлегендә җәй көннәрендә ястү намазының табигый вакыты еш кына керми, шуңа күрә Татарстан мөфтияте ястү вакытын тәкъдир (исәпләү) юлы белән билгели. Ястү намазын мөфтият календаренда күрсәтелгән вакыт җиткәч кенә укырга кирәк. Һәм әгәр дә төн кыска булу сәбәпле авырлык туса, ястү намазы кергәнче үк йокларга ятарга исәпләсәгез, иртәнге намазга чаклы иртәрәк торырга була. Ягъни ястү намазын үз вакытының ахырына якынрак итеп укый аласыз, ә иртәнге намазны вакыты керү белән. Бер уянуда икесен дә укыйсыз булып чыга.

– Икенде намазыннан соң намаз укырга ярамый диләр. Бу каза намазына да карыймы?
– Каза намазларын икендедән соң кояш баеганчы 30-40 минут кала укырга ярый. Ә нәфел намазларын икендедән соң уку – мәкруһ. 

– Мәкруһның нәрсә икәнен дә искә төшерсәгез иде. 
– Киңәш ителмәгән, хупланмаган гамәл. 

– Тәсбихне фарыздан соң әйтергәме, әллә сөннәттән соңмы?
– Фарыз намаздан соң сөннәт намазы булса, тәсбихне сөннәттән соң әйтергә кирәк. Фарыздан соң сөннәт намазы булса, фарыздан соң әйтү дөрес түгел. 

– Тәшәхүдтә кайберәүләр бармакны хәрәкәтләндерәләр. Имештер шайтанның башына сугалар. Бу дөрес гамәлме?
– Бармакны селкетеп утырырга кирәк түгел. Бер хәдистә Пәйгамбәребез салләллаһу галәйһи вә сәлләмнең бармагы селкенгәнлеге әйтелә, әмма ул махсус селкетү түгел, ә бармакны күтәргәндә җиңелчә калтырау булган. Аллаһы Тәгалә генә иң дөресен белүче.

– Елау тәһарәтне бозамы?
– Елау тәһарәтне бозмый. Әмма авыру сәбәпле күздән аккан сыекча тәһарәтне боза.