Радик Абдрахманов: “Ифтарлар кешеләрне берләштерә”

Быел да искәрмә булмады. 300ләп кунак катнашындагы ифтар югары дәрәҗәдә узды.

Ифтар мәҗлесенә хөкүмәт вәкилләре, төрле илләрнең Казандагы консуллары, дин эшлеклеләре, җәмәгать эшлеклеләре һәм төрле оешма вәкилләре килгән иде.
«Туган авылым» комплексын оештыручыларның берсе Радик Абдрахманов билгеләп узганча, быел ифтарга ресторанны рамазан аена хас булганча бизәргә тырышканнар.

Чынлап та, бәйрәм рухы килеп керүгә сизелә иде.  “Без бу айны бик сагынып көттек. Традиция буенча беренче ифтар да бездә уза. Биредә көн саен авыз ачу мәҗлесләре узачак. Ифтарлар кешеләрне берләштерә, аларны якынайта. Ифтарлар оештыру шәхсән безнең эшебезгә бәрәкәт тә китерә”, – диде ул. 

Быел хатын-кызлар ифтарының унынчы тапкыр узачагы һәм шулай ук республикакүләм ифтар оештырылачагын да икәртеп үтте.

Чарада мөнәҗәтләр яңгырады, вәгазьләр сөйләнде. Татарстан мөфтие  урынбасары Илфар хәзрәт Хәсәнов рамазан ае башлану белән котлады: “Рамазан – чистарыну, Аллаһның рәхмәтенә ирешү һәм газабыннан котылу ае. Аллаһның биргәненә шөкер, быел да рамазан аена ирештек, ураза тотуны, тәравих намазларын укуны насыйп итте.

Шушы айда Аллаһы Тәгалә һәрбарчабызга Үзенең рәхмәтен ирештерсен. Пәйгамбәребез салләллаһу галәйһи вә сәлләм: “Рамазан аенда бу айның изге ай икәнлегенә ышанган хәлдә әҗер-савабын бары тик Аллаһтан гына өмет итеп тәравих намазын кылучының барлык элеккеге гөнаһлары кичерелә”, – дигән», – дип сөйләде Илфар хәзрәт.