«Рамазан Фест» бәйрәмендә гомрәгә юллама уйнатылачак

“Беренче тапкыр узган бәйрәмдә 2-3 мең кеше катнашты. Елдан-ел анда килүчеләрнең саны артып тора. Узган ел Кремль яр буенда 15 меңнән артык кешене җыя алдык. Быел исә фестиваль 30 март көнне Камал театры каршындагы мәйданчыкта оештырылачак. Мөфтият белән аны республикакүләм бәйрәм итеп оештырырга уйлыйбыз. Быелгы бәйрәм чарасының темасы Ватанны саклаучылар елына багышлана”, – дип сөйләде “Ният” хәйрия фонды директоры Нияз Усманов журналистларга. 

Бәйрәм өч локациядә узар дип көтелә. Каюм Насыйри урамындагы чара тулысынча балалар өчен оештырыла. Аларга тарату өч мең әтәч кәнфит әзерләнеп куелган. Моннан тыш бушлай мастер-класслар оештырыла, “Әкияттә кунакта” зонасы эшләячәк. Мәрҗани урамына йөздән артык сәүдә ноктасы куелачак. Шулай ук ретро-машиналар күргәзмәсе белән танышып булачак. Камал театры бинасы крашындагы сәхнәдә җырчылар чыгыш ясаячак. Шунда ук кыр кухнясы, хәрби күргәзмә оештырылачак. Һәм бәйрәм ахырында гомрәгә юллама оту мөмкинлеге дә тудырылачак.