Равил хәзрәт Зөфәров: “Беребез дә фәрештә түгел, хаталанабыз”

Татарстан мөфтие урынбасары, “Мәрҗани” мәчете имам хатыйбы Равил хәзрәт Зөфәров аңлатканча, фитр сәдәкасының күләме Пәйгамбәребез Мөхәммәд салләллаһу галәйһи вә сәлләм әйтеп калдырганча исәпләнә.

– Фитр сәдакасы күләме турында билгеле булгач та, интернетта, бу муллаларга нәрсә җитми инде, каян уйлап табалардыр, дигән комментарийлар барлыкка килә. Элек фитрны азык-төлек белән таратканнар. Күләме бодай белән исәпләнгән. Голәмәләр шурасы да шуның бәясеннән чыгып исәпли. Фитрны ярма белән дә, акчалата да бирергә була. Безнең җирлегебездә, Хәнәфи мәзһәбе буенча, акчалата бирү күркәмрәк һәм файдалырак санала. Зәкят түләргә мөмкинлеге булганнар өчен фитр сәдакасының күләме алтын бәясеннән чыгып, 1100 сум була. Зәкят чыгару өчен нисаб күләме – 720 000 сум (алтын буенча). Пәйгамбәребезнең хәдисендә: «Рамазан уразасы җир белән күк арасында эленеп тора, һәм фитр сәдакасын биргәннән соң гына ул күкләргә ашачак», – диелә. Беребез дә фәрештә түгел, хаталанабыз-ялгышабыз. Фитр шул кимчелекләрдән чистарыну өчен дә һәм мохтаҗлар хакын үтәү өчен дә кирәк, – дип сөйләде ул матбугат очрашуында.