Теш дәвалаганда ясалган укол уразаны бозамы?

Җавап: “Үә галәйкүм әссәлам! Укол ясату уразаны бозмый. Авыз куышлыгына ясалган укол да уразаны бозмый, әмма бу очракта уколның тамчысы тамакка китү куркынычы бар. Теш ямаганда яисә алганда, аның кыйпылчыклары тамакка китәргә мөмкин. Бу очракта ураза бозыла.
Шәригатьтә уразага түбәндәгечә билгеләмә бирелә:

Ураза ул – ашказанына яисә аш кайнату әгъзаларына (үңәч, эчәклек) махсус яисә ялгышып ни дә булса керүдән, җенси якынлыктан тыелу (“Нур әл-Идах”).
Димәк, авыз куышлыгы аша үтеп ашказанына кергән бар нәрсә дә уразаны боза. Шунлыктан, ашыгыч ярдәм кирәк булмаган очракта, рамазан аенда тешләрне дәвалаудан тыелып тору хәерлерәк.
Ә Аллаһ – яхшырак белүче!

(Татарстан мөселманнары диния нәзарәте сайтыннан)
Фото: ru.freepik.com